ചെന്നൈ: പ്രമുഖ തമിഴ് നടൻ ആര്യയുടെ പേരിൽ വിവാഹ വാഗ്‌ദാനം നൽകി ലക്ഷങ്ങളുടെ തട്ടിപ്പ്. ജർമനിയിൽ സ്‌ഥിരതാമസമാക്കിയ തമിഴ് വംശജയായ ശ്രീലങ്കൻ യുവതിയാണ് തട്ടിപ്പുകാരുടെ വലയിലായത്. ഓൺലൈൻ വഴിയായിരുന്നു തട്ടിപ്പ്.
നടൻ ആര്യയാണെന്ന വ്യാജേന യുവതിയുമായി ചാറ്റ് ചെയ്‌ത തട്ടിപ്പുകാർ 65 ലക്ഷം രൂപയാണ് തട്ടിയെടുത്തത്. അധികം വൈകാതെ വിവാഹ മോചിതനാകുമെന്നും ഉടൻ തന്നെ യുവതിയെ വിവാഹം കഴിക്കാമെന്നുമായിരുന്നു വാഗ്‌ദാനം. ലക്ഷക്കണക്കിന് പണം നഷ്‌ടപ്പെട്ടതിന് പിന്നാലെയാണ് താൻ കബളിക്കപ്പെട്ടുവെന്ന് യുവതിക്ക് മനസിലായത്.
തുടർന്ന് സൈബർ പോലീസിൽ പരാതി നൽകുകയായിരുന്നു. അന്വേഷണത്തിനിടെ പോലീസ് ആര്യയെയും ചോദ്യം ചെയ്‌തിരുന്നു. ഇതോടെ ആൾമാറാട്ടം നടന്നതായി പൂർണമായും ബോധ്യപ്പെട്ടു. യുവതിയുമായി ചാറ്റ് ചെയ്‌ത കംപ്യൂട്ടറിന്റെ ഐപി അഡ്രസ് കേന്ദ്രീകരിച്ച് നടത്തിയ തിരച്ചിലിനൊടുവിൽ പ്രതികളെ പോലീസ് പിടികൂടുകയും ചെയ്‌തു.
ചെന്നൈ സ്വദേശികളായ മുഹമ്മദ് അർമൻ (29), മുഹമ്മദ് ഹുസൈനി (35) എന്നിവരാണ് അറസ്‌റ്റിലായത്‌.
Also Read: സുപ്രീം കോടതിക്ക് മുന്നിൽ ആത്‍മഹത്യക്ക് ശ്രമിച്ച യുവതി മരിച്ചു
