കാസർഗോഡ്: ജില്ലയിലെ മേൽപ്പറമ്പിൽ സദാചാര ആക്രമണം. മേൽപ്പറമ്പിൽ പിറന്നാൾ ആഘോഷത്തിന് എത്തിയവർക്ക് നേരെയാണ് സദാചാര ആക്രമണം നടന്നത്. വാഹനത്തിൽ ഏറെനേരം ഒരുമിച്ചിരുന്നുവെന്ന് ആരോപിച്ചാണ് ആൺകുട്ടികളുടെയും പെൺകുട്ടികളെയും നാട്ടുകാർ ചേർന്ന് ആക്രമിച്ചത്. വാഹനത്തിൽ നിന്നിറങ്ങാൻ അനുവദിക്കാതെ ഇവരെ തടഞ്ഞുവെക്കുകയുമായിരുന്നു.
ഇന്നലെ വൈകിട്ടായിരുന്നു സംഭവം. ഭക്ഷണം കഴിക്കുന്നതിനായി സംഘം കാർ നിർത്തിയപ്പോൾ ചിലർ ചോദ്യം ചെയ്യുകയും കശപിശ ഉണ്ടാക്കുകയുമായിരുന്നു. മൂന്ന് പെൺകുട്ടികൾ അടക്കം ആറ് പേരാണ് കാറിൽ ഉണ്ടായിരുന്നത്. ഇവരിൽ ഒരാളുടെ പിറന്നാൾ ആഘോഷത്തിന് എത്തിയതായിരുന്നു ഇവർ. മഴ ആയതിനാൽ പുറത്തിറങ്ങാനാകാതെ വന്നതോടെ കാറിൽ ഇരിക്കുകയായിരുന്നു.
ഇതുകണ്ട് നാട്ടുകാർ ചോദ്യം ചെയ്തു. ഇതിനെതിരെ സംസാരിച്ചതിന് പെൺകുട്ടിയെ നാട്ടുകാർ മർദ്ദിച്ചു. ഇത് ചോദ്യം ചെയ്ത ആൺകുട്ടിയെയും നാട്ടുകാർ മർദ്ദിച്ചതായാണ് പരാതി. സംഭവത്തിൽ മൂന്ന് പേരെ പോലീസ് അറസ്റ്റ് ചെയ്തു. അബ്ദുൾ മൻസൂർ, അഫീഖ്, മുഹമ്മദ് നിസാർ എന്നിവരെയാണ് പോലീസ് അറസ്റ്റ് ചെയ്തത്. തടഞ്ഞു വെക്കൽ, സംഘം ചേർന്ന് ആക്രമിക്കൽ തുടങ്ങിയ വകുപ്പുകൾ പ്രകാരമാണ് ഇവർക്കെതിരെ കേസെടുത്തിട്ടുള്ളത്.
Most Read: ഹർഷിനയുടെ വയറ്റിൽ കത്രിക കുടുങ്ങിയത് കോഴിക്കോട് മെഡിക്കൽ കോളേജിൽ നിന്നുതന്നെ; റിപ്പോർട്