ന്യൂഡെൽഹി: രാജ്യത്ത് പ്രോപ്പർട്ടി കാർഡുകളുടെ വിതരണം ഇന്ന് തുടങ്ങും. വായ്‌പയും മറ്റ് സാമ്പത്തിക ആനുകൂല്യങ്ങളും ലഭിക്കുന്നതിന് വേണ്ടി ഗ്രാമീണരുടെ സ്വത്ത് സാമ്പത്തിക ആസ്‌തിയായി ഉപയോഗിക്കുന്നതിന് വേണ്ടിയാണ് പ്രോപ്പർട്ടി കാർഡുകൾ ലഭ്യമാക്കുന്നത്. കാർഡുകളുടെ വിതരണം പ്രധാനമന്ത്രി നരേന്ദ്രമോദി വീഡിയോ കോൺഫറൻസ് വഴി ഉൽഘാടനം ചെയ്യും.
Also Read: റോഡപകടങ്ങള്‍ കുറക്കാന്‍ പുത്തൻ സാങ്കേതിക വിദ്യയുമായി കര്‍ണാടക സര്‍ക്കാര്‍
വായ്‌പയും സാമ്പത്തിക ആനുകൂല്യങ്ങളും നേടുന്നതിന് ഭൂമി ഉപയോഗിക്കാൻ ഗ്രാമീണ മേഖലയിൽ ഇപ്പോഴും പരിമിതികളുണ്ട്. വായ്‌പ നൽകുന്നതിന് വേണ്ടി പൊതുമേഖലാ ബാങ്കുകളടക്കം ചോദിക്കുന്ന പല രേഖകളും ഗ്രാമീണരുടെ പക്കൽ ഉണ്ടാകാറില്ല. ഇങ്ങനെയുള്ള സാഹചര്യങ്ങളിൽ പലപ്പോഴും കൊള്ളപ്പലിശക്കാരെയാണ് കർഷകരടക്കമുള്ള ഗ്രാമീണർ ആശ്രയിക്കുന്നത്. ഇതിനൊക്കെ ഒരു പരിഹാരമായാണ് പ്രോപ്പർട്ടി കാർഡുകൾ പ്രവർത്തിക്കുക. ഗ്രാമീണ മേഖലയിലെ സ്വത്തുടമകൾക്ക് വേണ്ടി ഏറ്റവും നൂതനമായ സാങ്കേതിക വിദ്യകൾ ഉൾകൊള്ളുന്ന വിപുലമായ ഒരു സംരംഭം നിലവിൽ വരുന്നത് ഇതാദ്യമാണ്.
സ്വാമിത്വ ( SVAMITVA- സർവേ ഓഫ് വില്ലേജ് ആൻഡ് മാപ്പിങ് വിത്ത് ഇംപ്രവൈസ്‌ഡ്‌ ടെക്നോളജി ഇൻ വില്ലേജ് ഏരിയാസ്) പദ്ധതിക്ക് കീഴിലാണ് പ്രോപ്പർട്ടി കാർഡുകൾ ആരംഭിച്ചത്. വിതരണത്തിന്റെ ആദ്യ ഘട്ടത്തിൽ രാജ്യത്തെ 6 സംസ്‌ഥാനങ്ങളിലായി 763 ഗ്രാമങ്ങൾക്കാണ് അതിന്റെ പ്രയോജനം ലഭിക്കുക. ഭൂമി ഉടമകൾക്ക് അവരുടെ മൊബൈൽ ഫോണുകളിൽ ലഭ്യമാകുന്ന എസ്എംഎസ് ലിങ്ക് വഴി പ്രോപ്പർട്ടി കാർഡ് ഡൗൺലോഡ് ചെയ്യാനും വളരെ എളുപ്പത്തിൽ ഉപയോഗിക്കാനും സാധിക്കും. വായ്‌പകൾ ലഭ്യമാക്കാനുള്ള പ്രോസസിങ് ഫീസ് അടക്കമുള്ള അധിക ചെലവുകളും ഇതിലൂടെ ഇല്ലാതാകും. നാല് വർഷം കൊണ്ട് രാജ്യത്തെ 6.62 ലക്ഷം ഗ്രാമങ്ങൾ പദ്ധതിയുടെ ഭാഗമാകും.
