ന്യൂഡെല്ഹി: മൂന്നാം ഘട്ട പരീക്ഷണത്തില് എത്തിയിരിക്കുന്ന ഓക്സ്ഫോർഡ് വാക്സിൻ യുവാക്കളിലേത് പോലെ പ്രായമായവരിലും ഫലപ്രദമെന്നു പരീക്ഷണ ഫലം. നേരിയ തോതില് മാത്രമാണ് വിപരീത ഫലങ്ങളുണ്ടാകുന്നത്. എന്നാല് കുട്ടികളില് പരീക്ഷണം തുടങ്ങിയിട്ടില്ല.
ഒരു വോളന്റിയര്ക്ക് ആരോഗ്യ പ്രശ്നം റിപ്പോര്ട്ട് ചെയ്തതിന് പിന്നാലെ പരീക്ഷണ നടപടികള് താല്ക്കാലികമായി നിര്ത്തിയിരുന്നു. ഇത് കഴിഞ്ഞ ദിവസമാണ് പുനരാരംഭിച്ചത്. കോവിഡ് ബാധിക്കാന് ഏറ്റവും സാധ്യതയുള്ള വിഭാഗത്തിലാണു പ്രായമായവര് ഉള്പ്പെടുന്നത്. ഇവരില് വാക്സിൻ പരീക്ഷണം വിപരീത ഫലം സൃഷ്ടിച്ചേക്കുമോയെന്ന ആശങ്കയും ഉണ്ടായിരുന്നു.
വാക്സിൻ വിപണിയില് എത്തിക്കുന്നത് ബ്രിട്ടിഷ്- സ്വീഡിഷ് കമ്പനി അസ്ട്രാസെനക ആണ്. ഓക്സ്ഫോർഡ് അടക്കമുള്ള ഒരു കമ്പനിയും കുട്ടികളില് പരീക്ഷണം തുടങ്ങിയിട്ടില്ല.