ന്യൂഡെല്‍ഹി: റിപ്പബ്ളിക് ടി.വിക്കും ചീഫ് എഡിറ്റര്‍ അര്‍ണബ് ഗോസ്വാമിക്കുമെതിരെ സുപ്രീംകോടതി. സോണിയ ഗാന്ധിക്കും അതിഥി തൊഴിലാളികള്‍ക്കും എതിരായ വിദ്വേഷ പരാമര്‍ശത്തിന്റെ പേരില്‍ രജിസ്‌റ്റര്‍ ചെയ്‌ത എഫ്.ഐ.ആര്‍ റദ്ദാക്കണമെന്ന് ആവശ്യപ്പെട്ട് അര്‍ണബ് സമര്‍പ്പിച്ച ഹരജി പരിഗണിക്കവേയാണ് കോടതിയുടെ പരാമര്‍ശം.
‘തുറന്നുപറയാം, എനിക്കിതിനോട് യോജിക്കാനാവില്ല. മാദ്ധ്യമ പ്രവര്‍ത്തനത്തില്‍ കുറച്ചുകൂടി ഉത്തരവാദിത്തം കാണിക്കണം. ഈ നിലയില്‍ മുന്നോട്ട് പോകാനാകില്ല. സമൂഹത്തിലെ ഐക്യവും സമാധാനവുമാണ് ഏറ്റവും പ്രധാനം. ആരും ചോദ്യം ചെയ്യപ്പെടലിന് അതീതരല്ല’, ചീഫ് ജസ്‌റ്റിസ് എസ്.എ ബോബ്ഡെ പറഞ്ഞു.
Read Also: സുപ്രീംകോടതി നടപടികളുടെ തല്‍സമയ സംപ്രേഷണം; തീരുമാനം ഉടന്‍
ചില വിഷയങ്ങള്‍ കൈകാര്യം ചെയ്യുമ്പോള്‍ പ്രത്യേകം ജാഗ്രത പുലര്‍ത്തണം. നിങ്ങള്‍ ഉത്തരവാദിത്തത്തോടെ ആണ് കാര്യങ്ങള്‍ റിപ്പോര്‍ട്ട് ചെയ്യുന്നതെന്ന ഉറപ്പ് ഞങ്ങള്‍ക്ക് കിട്ടണം- കോടതി പറഞ്ഞു. റിപ്പബ്ളിക് ടി.വിയുമായി ബന്ധപ്പെട്ട് ഓരോ ദിവസവും കേസുകള്‍ വരികയാണെന്ന് കോടതി ചൂണ്ടിക്കാട്ടി. അര്‍ണബിന്റെ വാദങ്ങള്‍ വിശദീകരിച്ച് സത്യവാങ്മൂലം നല്‍കാനും കോടതി നിര്‍ദേശിച്ചു. രണ്ടാഴ്‌ച്ചക്ക് ശേഷം കേസ് വീണ്ടും പരിഗണിക്കും.
