ഡെൽഹി: പ്രധാനമന്ത്രി നരേന്ദ്രമോദിയെ പുകഴ്‌ത്തി ഉത്തരാഖണ്ഡ് മുഖ്യമന്ത്രി തിരാത്ത് സിംഗ് റാവത്ത്. ഭാവിയിൽ മോദി ശ്രീരാമനെപ്പോലെ ആരാധിക്കപ്പെടും എന്ന് അദ്ദേഹം പറഞ്ഞു. ഹരിദ്വാറിലെ ഋഷികുൽ ആയുർവേദ കോളജിൽ വച്ച് നടത്തിയ നേത്ര കുംഭ് എന്ന പരിപാടിയിൽ വച്ചാണ് തിരാത്ത് സിംഗിന്റെ പ്രഖ്യാപനം.
‘ഇന്ന് ലോകനേതാക്കൾ പ്രധാനമന്ത്രിക്കൊപ്പം ചിത്രമെടുക്കാൻ ക്യൂ നിൽക്കുകയാണ്. നമ്മുടെ പ്രധാനമന്ത്രിയെപ്പറ്റി ലോക നേതാക്കൾ ശ്രദ്ധിക്കാതിരുന്ന പഴയ കാലം പോലെയല്ല ഇത്. നരേന്ദ്രമോദി കാരണം ഈ സാഹചര്യം മാറി. ഇത് അദ്ദേഹം സൃഷ്‌ടിച്ച പുതിയ ഇന്ത്യയാണ്.
പണ്ട് രാമനും ഇതുപോലെ സമൂഹത്തിനായി നല്ല കാര്യങ്ങൾ ചെയ്‌തിരുന്നു. അങ്ങനെയാണ് ആളുകൾ അദ്ദേഹത്തെ ദൈവമായി കണക്കാൻ തുടങ്ങിയത്. അതുപോലെ, ഭാവിയിൽ നമ്മുടെ പ്രിയപ്പെട്ട പ്രധാനമന്ത്രിയും ഇങ്ങനെ ആരാധിക്കപ്പെടും’- തിരാത്ത് സിംഗ് പറഞ്ഞു.
കുംഭമേളക്ക് എല്ലാവർക്കും പങ്കെടുക്കാനാവുമെന്നും അദ്ദേഹം കൂട്ടിച്ചേർത്തു. ഉത്തരാഖണ്ഡിലെ ബിജെപിയിൽ ഉണ്ടായ പൊട്ടിത്തെറയെ തുടർന്ന് മുഖ്യമന്ത്രി ത്രിവേന്ദ്ര സിംഗ് റാവത്ത് രാജി വെച്ചതോടെയാണ് ദിവസങ്ങൾക്കു മുൻപ് പുതിയ മുഖ്യമന്ത്രിയായി തിരാത്ത് സിംഗ് ചുമതലയേറ്റത്.
