തിരുവനന്തപുരം: കെഎസ്ഇബിയിലെ പ്രശ്‌ന പരിഹാരത്തിന് വൈദ്യുതി മന്ത്രി നിര്‍ദ്ദേശിച്ച കാലാവധി ഇന്ന് അവസാനിക്കും. കെഎസ്ഇബി ഓഫിസേഴ്‌സ് അസോസിയേഷന്റെ സംസ്‌ഥാന ഭാരവാഹികളെ സ്‌ഥലം മാറ്റിയ ഉത്തരവ് നിലനിൽക്കുകയാണ്. പ്രശ്‌നത്തിന് പരിഹാരം ആയില്ലെങ്കിൽ മെയ് 16 മുതൽ ചട്ടപ്പടി സമരം നടത്താനാണ് അസോസിയേഷന്റെ തീരുമാനം.
അസോസിയേഷൻ ഭാരവാഹികളായ എംജി സുരേഷ് കുമാർ, ബി ഹരികുമാര്‍, ജാസ്‌മിൻ ബാനു എന്നിവരെയാണ് സ്‌ഥലം മാറ്റിയത്. ഈ മാസം അവസാനിക്കുന്നതിന് മുമ്പ് ചുമതലയേറ്റില്ലെങ്കില്‍ , ജോലിയില്‍ നിന്ന് അനധികൃതമായി വിട്ടുനില്‍ക്കുന്നതായി കണക്കാക്കി ഇവർക്കെതിരെ തുടര്‍നടപടിയുണ്ടാകും.
അതേസമയം ഇത് പ്രതികാര നടപടിയാണെന്നും അംഗീകരിക്കാനാകില്ലെന്നും ഓഫിസേഴ്‌സ് അസോസിയേഷന്‍ വ്യക്‌തമാക്കുന്നു. തൊഴിലാളി യൂണിയനുകളുടെ ഹിതപരിശോധന വ്യാഴാഴ്‌ച നടക്കാനിരിക്കെ, ഓഫിസേഴ്‌സ് അസോസിയേഷന്‍ കടുത്ത നിലപാടിലേക്ക് ഉടന്‍ പോകില്ലെന്നാണ് സൂചന. മെയ് ആദ്യവാരം മുതല്‍ മേഖലാ ജാഥകളും പ്രശ്‌ന പരിഹാരമില്ലെങ്കില്‍ 16 മുതല്‍ ചട്ടപ്പടി സമരവും ഉണ്ടാകും എന്നാണ് അസോസിയേഷൻ പ്രഖ്യാപിച്ചിരിക്കുന്നത്.
Most Read: സിൽവർ ലൈൻ സംവാദം; പുതിയ പാനൽ ഉണ്ടാകില്ല-അടിയന്തിര യോഗം വിളിച്ച് ചീഫ് സെക്രട്ടറി
