തിരുവനന്തപുരം : സംസ്ഥാനത്ത് തദ്ദേശ തിരഞ്ഞെടുപ്പിന്റെ വോട്ടെണ്ണലിനിടെ വോട്ടിംഗ് യന്ത്രങ്ങള്‍ തകരാറിലായ രണ്ട് ബൂത്തുകളില്‍ ഇന്ന് റീപോളിംഗ് നടക്കും. വയനാട്, മലപ്പുറം ജില്ലകളിലെ വാര്‍ഡുകളിലാണ് റീപോളിംഗ് നടക്കുന്നത്. വയനാട് ജില്ലയിലെ ബത്തേരി നഗരസഭയില്‍ തൊടുവെട്ടി വാര്‍ഡിലെയും, മലപ്പുറം ജില്ലയിലെ തിരൂരങ്ങാടി നഗരസഭയിലെ കിസാന്‍ കേന്ദ്രം വാര്‍ഡിലുമാണ് യന്ത്രത്തകരാര്‍ മൂലം വോട്ടെണ്ണല്‍ നടക്കാതിരുന്നത്.
തൊടുവെട്ടി വാര്‍ഡിലെ റീപോളിംഗ് നടക്കുക മാര്‍ബസേലിയസ് കോളജ് ഓഫ് എഡ്യൂക്കേഷൻ പടിഞ്ഞാറ് ഭാഗം ഒന്നാം നമ്പര്‍ ബൂത്തിലും, കിസാന്‍ കേന്ദ്രം വാര്‍ഡിലെ റീപോളിംഗ് നടക്കുക ജിഎച്ച് സ്‌കൂള്‍ തൃക്കുളം ഒന്നാം നമ്പര്‍ ബൂത്തിലുമാണ്. ഇവിടങ്ങളില്‍ വോട്ടെണ്ണല്‍ ദിവസം വോട്ടിംഗ് യന്ത്രങ്ങളില്‍ പിഴവ് ഉണ്ടായതിനെ തുടര്‍ന്ന് ടെക്‌നീഷ്യൻമാർ എത്തിയെങ്കിലും അതിലെ വിവരങ്ങള്‍ വീണ്ടെടുക്കാനായില്ല.
ഇന്ന് രാവിലെ 7 മണി മുതല്‍ വൈകുന്നേരം 6 മണി വരെയാണ് റീപോളിംഗ് നടക്കുക. ശേഷം ഇന്ന് രാത്രി 8 മണിയോടെ ഇരു മുനിസിപ്പാലിറ്റി ഓഫീസുകളിലും വോട്ടെണ്ണല്‍ നടത്തി വിജയിയെ പ്രഖ്യാപിക്കുമെന്നും അധികൃതര്‍ വ്യക്‌തമാക്കി.
Read also : സംസ്‌ഥാനത്തെ എല്ലാ കെഎസ്ആര്‍ടിസി സർവീസുകളും ഇന്ന് മുതല്‍ പുനഃരാരംഭിക്കും
