ന്യൂഡെൽഹി : രാജ്യത്ത് റഷ്യയിൽ നിന്നും ഇറക്കുമതി ചെയ്യുന്ന സ്‌പുട്നിക്-5 വാക്‌സിന്റെ ഒരു ഡോസിന് 995.40 രൂപ വിലവരുമെന്ന് റിപ്പോർടുകൾ വ്യക്‌തമാക്കുന്നു. 5 ശതമാനം ജിഎസ്‌ടി അടക്കമാണ് വാക്‌സിന് ഇത്രയധികം വില വരുന്നത്. അതേസമയം വാക്‌സിൻ രാജ്യത്ത് തന്നെ നിർമിക്കാനായാൽ വില കുറയാൻ സാധ്യതയുണ്ടെന്നും റിപ്പോർടുകൾ സൂചിപ്പിക്കുന്നുണ്ട്.
ഡോക്‌ടർ റെഡ്ഡിസ് ലബോറട്ടറീസാണ് ഇന്ത്യയിൽ സ്‌പുട്നിക് വാക്‌സിന്റെ നിർമാതാക്കൾ. 91.6 ശതമാനം ഫലപ്രാപ്‌തിയാണ് സ്‌പുട്നിക് അവകാശപ്പെടുന്നത്. ഇന്ത്യയിൽ നിലവിൽ വിതരണം ചെയ്യുന്ന കൊവാക്‌സിൻ, കോവിഷീൽഡ്‌ എന്നീ വാക്‌സിനുകളെക്കാൾ ഫലപ്രാപ്‌തിയാണ് സ്‌പുട്നിക്-5 അവകാശപ്പെടുന്നത്. അടുത്ത ആഴ്‌ച മുതൽ വാക്‌സിൻ ലഭ്യമായി തുടങ്ങിയേക്കും.
അതേസമയം, രാജ്യത്ത് കോവിഡ് വ്യാപനം രൂക്ഷമായി തുടരുകയാണ്. 24 മണിക്കൂറിൽ 3,43,144 പേർക്കാണ് പുതുതായി കോവിഡ് സ്‌ഥിരീകരിച്ചത്. കൂടാതെ 4000 പേർ കോവിഡ് ബാധിച്ച് മരിക്കുകയും ചെയ്‌തു. സംസ്‌ഥാനങ്ങളിലെ ലോക്ക്ഡൗണും കോവിഡ് മാനദണ്ഡങ്ങളും പ്രതിദിന കോവിഡ് കേസുകളുടെ എണ്ണത്തിൽ നേരിയ കുറവ് വരുത്തിയതായി കേന്ദ്ര ആരോഗ്യ മന്ത്രാലയം വിലയിരുത്തി.
Read also : ചുഴലിക്കാറ്റ് മുന്നറിയിപ്പ്; കടൽക്ഷോഭവും രൂക്ഷം; കരകവിഞ്ഞ് പുഴകൾ
