തിരുവനന്തപുരം: സിൽവർലൈൻ പദ്ധതിയുമായി ബന്ധപ്പെട്ട പുനരധിവാസ പാക്കേജ് പ്രഖ്യാപിച്ചു. വാസസ്‌ഥലം നഷ്‌ടപ്പെടുന്നവർക്ക് 4.60 ലക്ഷം രൂപ നഷ്‌ട പരിഹാരം നൽകും. അല്ലെങ്കിൽ നഷ്‌ട പരിഹാരവും 1,50,000 രൂപയും ലൈഫ് മാതൃകയിൽ വീടും നിർമിച്ചു നൽകും.
വാസസ്‌ഥലം നഷ്‌ടമാകുകയും ഭൂരഹിതരാകുകയും ചെയ്യുന്ന അതിദരിദ്ര കുടുംബങ്ങൾക്ക് നഷ്‌ട പരിഹാരവും 5 സെന്റ് ഭൂമിയും ലൈഫ് മാതൃകയിൽ വീടും നൽകും. അല്ലെങ്കിൽ നഷ്‌ട പരിഹാരവും 5 സെന്റ് ഭൂമിയും 4 ലക്ഷം രൂപയും, അതല്ലെങ്കിൽ നഷ്‌ട പരിഹാരവും 10 ലക്ഷവും നൽകും.
പദ്ധതിയുമായി ബന്ധപ്പെട്ട് കാലിത്തൊഴുത്ത് പൊളിച്ചു നീക്കിയാൽ 25000- 50000 രൂപ വരെ നഷ്‌ട പരിഹാര തുക നൽകും. വാണിജ്യ സ്‌ഥാപനം നഷ്‌ടപ്പെടുന്നവർക്ക് 50,000 രൂപയും വാടക കെട്ടിടത്തിലെ വാണിജ്യ സ്‌ഥാപനം നഷ്‌ടമാകുന്നവർക്ക് 2 ലക്ഷം രൂപയും നൽകും.
വാസസ്‌ഥലം നഷ്‌ടമാകുന്ന വാടകക്കാർക്ക് 30,000 രൂപയും സ്വയം തൊഴിൽ നഷ്‌ടമാകുന്നവർക്ക് 50,000 രൂപയും നൽകും. ഒഴിപ്പിക്കപ്പെടുന്ന വാണിജ്യ സ്‌ഥാപനങ്ങളിലെ തൊഴിലാളികൾക്ക് 6000 വീതം 6 മാസം നൽകും. പെട്ടിക്കടകൾ‌ക്ക് 25,000 മുതൽ 50,000 രൂപ വരെ ലഭിക്കും. പുറമ്പോക്കിൽ കച്ചവടം നടത്തുന്നവർക്ക് ചമയങ്ങളുടെ വിലയും 5000 വീതം 6 മാസവും വരെ നൽകും.
Malabar News: ഓടിക്കൊണ്ടിരുന്ന ബസിന് തീപിടിച്ചു; യാത്രക്കാർ ഇറങ്ങിയോടി രക്ഷപെട്ടു
