തിരുവനന്തപുരം : സംസ്ഥാനത്ത് ഇന്ന് കോവിഡ് ബാധിച്ച് മരിച്ചവരുടെ എണ്ണം ആറ് ആയി. കാസര്കോട്, കോഴിക്കോട്, മലപ്പുറം, കോട്ടയം, ആലപ്പുഴ, പത്തനംതിട്ട സ്വദേശികളാണ് ഇന്ന് മരിച്ചത്.
കാസര്കോട് ജില്ലയില്, പരിയാരം മെഡിക്കല് കോളേജില് ചികിത്സയിലായിരുന്ന തൃക്കരിപ്പൂര് ഈയ്യക്കാട് സ്വദേശി പി വിജയകുമാര്(55) ആണ് മരിച്ചത്. ഇയാളുടെ കുടുംബത്തിലെ മൂന്ന് പേര്ക്ക് നേരത്തെ രോഗം സ്ഥിരീകരിച്ചിരുന്നു. കടുത്ത ശ്വാസതടസത്തെ തുടര്ന്ന് വിജയകുമാര് ദിവസങ്ങളായി വെന്റിലേറ്ററിലായിരുന്നു. അരൂര് സ്വദേശിയായ തങ്കമ്മ(78) ആണ് ആലപ്പുഴ ജില്ലയില് മരിച്ചത്. ഇവര് ആലപ്പുഴ വണ്ടാനം മെഡിക്കല് കോളേജില് ചികിത്സയിലായിരുന്നു. ഇവര്ക്ക് വാര്ദ്ധക്യ സഹജമായ മറ്റ് അസുഖങ്ങളും ഉണ്ടായിരുന്നതായി ആരോഗ്യവകുപ്പ് അധികൃതര് അറിയിച്ചു. കരിമ്പ്രം സ്വദേശിയായ കുഞ്ഞിമൊയ്തീന്(65) ആണ് മലപ്പുറം ജില്ലയില് മരിച്ചത്. ഇയാള് മഞ്ചേരി മെഡിക്കല് കോളേജില് ചികിത്സയിലിരിക്കെയാണ് മരിച്ചത്.
കോഴിക്കോട് മാവൂര് സ്വദേശിയായ മുഹമ്മദ് ബഷീര്, വടവൂര് ചന്ദ്രാലയത്തില് പി എന് ചന്ദ്രന്, പ്രമാടം സ്വദേശിയായ പുരുഷോത്തമന് എന്നിവരാണ് മരിച്ച മറ്റ് മൂന്ന് പേര്. പുരുഷോത്തമന് ന്യുമോണിയ ബാധിച്ചും ചികിത്സയിലായിരുന്നു. മരിച്ച മുഹമ്മദ് ബഷീറിന്റെ കുടുംബത്തിലെ 13 പേര്ക്ക് നേരത്തെ കോവിഡ് സ്ഥിരീകരിച്ചിരുന്നു. ഇവര് ഇപ്പോള് വിവിധ ആശുപത്രികളില് ചികിത്സയിലാണ്.