കോഴിക്കോട്: കോവിഡ് ചികില്‍സയില്‍ കഴിയുന്ന യുവതിയെ പീഡിപ്പിക്കാന്‍ ശ്രമിച്ച സംഭവത്തിൽ സംസ്‌ഥാന വനിതാ കമ്മീഷൻ സ്വമേധയാ കേസെടുത്തു. സംഭവത്തിൽ വിശദമായ റിപ്പോർട്ട് കൈമാറാൻ കോഴിക്കോട് റൂറൽ എസ് പിക്ക് നിദേശം നൽകി.
കോഴിക്കോട് മൊടക്കല്ലൂർ മലബാര്‍ മെഡിക്കല്‍ കോളജിൽ കോവിഡ് ചികില്‍സയില്‍ കഴിയുന്ന യുവതിയെ ആശുപതിയിലെ പര്‍ച്ചേസ് ഡിപ്പാര്‍ട്ട്മെന്റിലെ ജീവനക്കാരനായ അശ്വിൻ ആണ് പീഡിപ്പിക്കാൻ ശ്രമിച്ചത്. ഞായറാഴ്‌ച രാത്രി പതിനൊന്നരയോടെ ഡോക്‌ടറെ കാണിക്കാനെന്ന് പറഞ്ഞ് വിളിച്ചു വരുത്തി ആളൊഴിഞ്ഞ ഭാഗത്തേക്ക് കൊണ്ടുപോയി പീഡിപ്പിക്കാന്‍ ശ്രമിച്ചെന്നാണ് പരാതി.
രജിസ്‌റ്ററില്‍ നിന്ന് പേരു വിവരങ്ങള്‍ക്കൊപ്പമുള്ള മൊബൈൽ നമ്പറിൽ വിളിച്ച് അനാവശ്യങ്ങൾ പറയുകയും വാട്‍സ് ആപ്പിൽ അശ്ളീല വാചകങ്ങൾ അയച്ചതായും യുവതി പറഞ്ഞു. എന്നാൽ ഇക്കാര്യത്തിൽ ആശുപത്രി അധികൃതര്‍ വേണ്ട നടപടി സ്വീകരിച്ചില്ലെന്നും യുവതി കൂട്ടിച്ചേർത്തു. സംഭവത്തെ തുടർന്ന് അശ്വിനെ സസ്‍പെന്‍ഡ് ചെയ്‌തു.
കഴിഞ്ഞ വ്യാഴാഴ്‌ചയാണ്‌ യുവതിക്ക് കോവിഡ് സ്‌ഥിരീകരിക്കുന്നത്. തുടർന്ന് മലബാർ മെഡിക്കൽ കോളേജിൽ ചികിൽസ തേടുകയായിരുന്നു. യുവതിയുടെ മാതാപിതാക്കളും കോവിഡ് ബാധിച്ച് ഇതേ ആശുപത്രിയിൽ ചികിൽസയിലാണ്.
Malabar News: കണ്ണൂര്‍ വിമാനത്താവളത്തില്‍ 35 ലക്ഷം വിലവരുന്ന സ്വര്‍ണം ഉപേക്ഷിച്ച നിലയില്‍
