പാലക്കാട്: മലമ്പുഴ, പാലക്കാട് മണ്ഡലങ്ങളിൽ വോട്ട് കച്ചവട ആരോപണവുമായി ബിജെപി. മലമ്പുഴയിൽ സിപിഎമ്മിന് കോൺഗ്രസ് വോട്ട് മറിച്ചപ്പോൾ പാലക്കാട് സിപിഎം പ്രത്യുപകാരം ചെയ്തുവെന്ന് ബിജെപി ജനറൽ സെക്രട്ടറി സി കൃഷ്ണകുമാർ ആരോപിച്ചു. മലമ്പുഴയിൽ കോൺഗ്രസ് ആധിപത്യമുള്ള സ്ഥലങ്ങളിൽ അവർ മൂന്നാമത് എത്തിയത് ഈ കച്ചവടത്തിന് തെളിവാണ്. ബിജെപിയുടെ സംഘടനാ സംവിധാനം മലമ്പുഴയിൽ ശക്തമായിരുന്നുവെന്നും സി കൃഷ്ണകുമാർ പറഞ്ഞു.
നിയമസഭാ തിരഞ്ഞെടുപ്പിൽ അട്ടിമറി വിജയം പ്രതീക്ഷിച്ച് സംപൂജ്യരായതിന്റെ ഞെട്ടൽ ബിജെപി നേതൃത്വത്തിന് ഇതുവരെ മാറിയിട്ടില്ല. കഷ്ടപ്പെട്ട് തുറന്ന നേമത്തെ അക്കൗണ്ട് ഉൾപ്പടെ നഷ്ടപ്പെട്ടതിൽ ദേശീയ നേതൃത്വത്തിന് മുന്നിൽ വിശദീകരണം നൽകാൻ പാർട്ടി സംസ്ഥാന അധ്യക്ഷൻ കെ സുരേന്ദ്രൻ പാടുപെടും.
മൽസരിച്ച രണ്ട് മണ്ഡലങ്ങളിലും തോൽവി നേരിട്ട സുരേന്ദ്രനും പ്രതിസന്ധിയിലാണ്. രണ്ടാം സ്ഥാനത്തേക്ക് എത്തിയ പാലക്കാടും നേമത്തും മഞ്ചേശ്വരത്തുമെല്ലാം വർഗീയ ദ്രുവീകരണം ഉണ്ടായെന്നാണ് സുരേന്ദ്രന്റെ ആരോപണം.
Also Read: ചോദ്യമുനകൾക്ക് മുന്നിൽ സുരേന്ദ്രൻ; പുനഃസംഘടനക്ക് സാധ്യത