കോഴിക്കോട് : തദ്ദേശ തിരഞ്ഞെടുപ്പിന്റെ മൂന്നാംഘട്ടം ഡിസംബര്‍ 14 ആം തീയതി നടക്കുന്നതിനോട് അനുബന്ധിച്ച് യന്ത്രങ്ങളുടെ പരിശോധനയില്‍ കാലതാമസം. കഴിഞ്ഞ ദിവസം കോഴിക്കോട് ജില്ലയിലെ പഞ്ചായത്തുകളിലാണ് സംഭവം. ഇതോടെ വോട്ടിംഗ് യന്ത്രങ്ങളുടെ പരിശോധനക്കായി എത്തിയ ആളുകള്‍ കാത്തിരുന്ന് വലഞ്ഞു.
തോടന്നൂര്‍ ബ്ളോക്ക് ഡിവിഷനിലും വില്യാപ്പള്ളി, ആയഞ്ചേരി, തിരുവള്ളൂര്‍, മണിയൂര്‍ എന്നീ പഞ്ചായത്തുകളിലേക്കുമുള്ള വോട്ടിംഗ് യന്ത്രങ്ങളുടെ പരിശോധനക്കിടയിലാണ് പ്രശ്‌നമുണ്ടായത്. ഇവിടേക്ക് ആകെ പരിശോധിക്കാനുള്ളത് 1850 യന്ത്രങ്ങളാണ്. എന്നാല്‍ രാവിലെ 8 മണി മുതല്‍ തുടങ്ങിയ പരിശോധന ഉച്ചക്ക് 2 മണിയായിട്ടും ആകെ പരിശോധിച്ചത് 2 യന്ത്രങ്ങള്‍ മാത്രമായിരുന്നു. ഇതോടെ പരിശോധനക്കായി എത്തിയ സ്‌ഥാനാര്‍ഥികളും മറ്റ് പ്രവര്‍ത്തകരും കാത്തിരുന്ന് വലയാന്‍ തുടങ്ങിയിരുന്നു.
പരിശോധന നടത്താനായി എത്തിയ ഉദ്യോഗസ്‌ഥരുടെ പരിചയക്കുറവ് ഉള്‍പ്പടെയുള്ള കാര്യങ്ങളാണ് കാലതാമസത്തിന് ഇടയാക്കിയത്. യന്ത്രങ്ങളുടെ പരിശോധനയില്‍ കാലതാമസം ഉണ്ടായതോടെ പലരും തിരിച്ചു പോയിരുന്നു. പിന്നീട് ഏറെ വൈകിയാണ് യന്ത്രങ്ങളുടെ പരിശോധന പൂര്‍ത്തിയാക്കിയത്.
Read also : വോട്ടെടുപ്പ് കഴിഞ്ഞു; ഇനി ബൂത്തുകളും പരിസരവും വൃത്തിയാക്കല്‍
