സാര്സ് കൊറോണ വൈറസ്-2ന്റെ പുതിയ വകഭേദമാണ് ഒമൈക്രോണ് അഥവാ ബി. 1. 1. 529. കഴിഞ്ഞ നവംബര് 22ന് ദക്ഷിണ ആഫ്രിക്കയിലാണ് ഒമൈക്രോണ് റിപ്പോര്ട് ചെയ്തത്.
ഈ വകഭേദത്തിന് 30 തവണയില് കൂടുതല് പ്രോട്ടീന് വ്യതിയാനം സംഭവിച്ചിട്ടുണ്ട്. കൂടുതലായുള്ള പകര്ച്ചാശേഷി, പ്രതിരോധ ശക്തിയെ തകര്ക്കാനുള്ള കഴിവ്, ദക്ഷിണാഫ്രിക്കയില് കേസുകളുടെ എണ്ണത്തില് പെട്ടെന്നുണ്ടായ വര്ധനവ് ഇവ പരിഗണിച്ചാണ് ലോകാരോഗ്യ സംഘടന ഇതിനെ വേരിയന്റ് ഓഫ് കണ്സേണ് ആയി പ്രഖ്യാപിച്ചത്.
പരിശോധന എങ്ങനെ?
സാര്സ് കൊറോണ 2 വൈറസിനെ കണ്ടുപിടിക്കുവാന് സാധരണയായി ഉപയോഗിക്കുന്നതും കൂടുതല് സ്വീകാര്യവുമായ മാര്ഗമാണ് ആര്ടിപിസിആര് എങ്കിലും ഒമൈക്രോണ് സാന്നിധ്യം സ്ഥിരീകരിക്കുന്നത് ഒമൈക്രോണ് ജനിതക നിര്ണയ പരിശോധന നടത്തിയാണ്.
എങ്ങനെ സുരക്ഷിതരാകാം?
ഒമൈക്രോൺ കൂടുതല് അപകടകരമാക്കുന്നത് അതിന്റെ അതിതീവ്ര വ്യാപനശേഷിയാണ്. ഇതുവരെ കോവിഡിനെതിരെ സ്വീകരിച്ചിട്ടുള്ള പ്രതിശോധ നടപടികള് നാം തുടരണം. മാസ്ക് ശരിയായി ധരിക്കുക, രണ്ട് ഡോസ് വാക്സിന് എടുക്കുക, ശാരീരിക അകലം പാലിക്കുക, കൈകള് ഇടക്കിടെ ശുചിയാക്കുക, മുറികളിലും മറ്റും കഴിയുന്നത്ര വായു സഞ്ചാരം ഉറപ്പാക്കുക തുടങ്ങിയ കാര്യങ്ങള് നിര്ബന്ധമായും ചെയ്യണം.
മറക്കരുത് വാക്സിനേഷന്
ഇതുവരെയും വാക്സിൻ എടുക്കാത്തവര് ഉടന് തന്നെ വാക്സിന് സ്വീകരിക്കേണ്ടതാണ്. വാക്സിന് നല്കുന്ന സുരക്ഷ ആന്റിബോഡി, കോശങ്ങളുടെ പ്രതിരോധ ശേഷി എന്നിവയുമായി ബന്ധപ്പെട്ടിരിക്കുന്നതിനാല് കോവിഡിനെതിരെ സുരക്ഷ നല്കുവാന് വാക്സിനുകള്ക്ക് കഴിയും.
കൂടാതെ കോവിഡ് രോഗ തീവ്രത കുറക്കുവാനും വാക്സിനുകള്ക്ക് കഴിയും. അതിനാല് ഇപ്പോള് ലഭ്യമായിട്ടുള്ള വാക്സിനുകള് രണ്ട് ഡോസ് എടുക്കേണ്ടത് അനിവാര്യമാണ്. കോവിഡ് വാക്സിന് ഇതുവരെയും എടുക്കാത്തവര് ഉടന് തന്നെ വാക്സിന് സ്വീകരിക്കണം.
വൈറസുകള്ക്ക് പകരാനും പെരുകാനും ശേഷി ഉള്ളിടത്തോളം അതിന് വകഭേദങ്ങള് ഉണ്ടാകുമെന്ന കാര്യവും നാം മറന്നുകൂട. വകഭേദങ്ങള് അപകടകാരികള് അല്ലെങ്കില് അതിനെ ശ്രദ്ധിക്കേണ്ടി വരില്ലായിരുന്നു. കൂടുതല് പകര്ച്ചാ ശേഷി, ഒരു പ്രാവശ്യം രോഗം ബാധിച്ചവര്ക്ക് വീണ്ടും രോഗം വരുക എന്നിങ്ങനെ ഉണ്ടാകുമ്പോഴാണ് വകഭേദത്തിനെ കൂടുതല് ശ്രദ്ധിക്കുക. വകഭേദങ്ങള് ഉണ്ടാകാതിരിക്കുവാനുള്ള ഏറ്റവും പ്രധാന നടപടി കോവിഡ് ബാധ കുറക്കുക എന്നത് തന്നെയാണ്.
Most Read: താരനും മുടി കൊഴിച്ചിലും തടയാം; ഈ ഹെയര് മാസ്ക് പരീക്ഷിച്ചു നോക്കൂ