സംസ്ഥാനത്ത് ഇന്ന് നാല് പേർ കൂടി കോവിഡ് ബാധിച്ചു മരിച്ചു. കോഴിക്കോട്, ആലപ്പുഴ ജില്ലകളിലാണ് മരണം റിപ്പോർട്ട് ചെയ്തത്. ഇതിൽ മൂന്ന് മരണവും സംഭവിച്ചത് കോഴിക്കോട് മെഡിക്കൽ കോളേജ് ആശുപത്രിയിലാണ്.
കോഴിക്കോട് നല്ലളം അരീക്കാട് സ്വദേശി ഹംസ (72), മലപ്പുറം നടുവത്ത് സ്വദേശി മുഹമ്മദ് ഇഖ്ബാൽ (58), മലപ്പുറം ചെറിയമുണ്ട സ്വദേശി എയ്ന്തീൻ കുട്ടി (71) എന്നിവരാണ് ഇന്ന് മരിച്ചത്. മൂന്ന് പേരും കോവിഡ് ബാധിച്ച് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിൽ കഴിയവേ ആണ് മരണപ്പെട്ടത്.
ആലപ്പുഴയിൽ കനാൽ വാർഡ് സ്വദേശി ക്ലീറ്റസ് (82) ആണ് മരിച്ച മറ്റൊരാൾ. ഇന്നലെ രാത്രിയോടെ വീട്ടിൽ വച്ചായിരുന്നു മരണം സംഭവിച്ചത്. കഴിഞ്ഞ ദിവസം പനി ബാധിച്ചു ജില്ലാ ആശുപത്രിയിൽ ചികിത്സ തേടിയ ക്ലീറ്റസിന്റെ സ്രവം പരിശോധനയ്ക്ക് എടുത്തിരുന്നു. തുടർന്ന് പരിശോധനാഫലം പോസിറ്റീവ് ആവുകയായിരുന്നു.
