ലഖ്‌നൗ: അപര്‍ണ യാദവിനെ സ്വീകരിച്ചതില്‍ ബിജെപിക്ക് നന്ദി പറഞ്ഞ് സമാജ്‌വാദി പാര്‍ട്ടി അധ്യക്ഷന്‍ അഖിലേഷ് യാദവ്. ഞങ്ങള്‍ക്ക് ടിക്കറ്റ് നല്‍കാന്‍ കഴിയാത്ത എല്ലാവർക്കും സീറ്റ് നൽകാൻ അവര്‍ക്ക് കഴിയുന്നുണ്ട്. അതിനാൽ അവർക്ക് നന്ദി പറയുന്നു എന്നായിരുന്നു അഖിലേഷ് പറഞ്ഞത്.
യുപി നിയമസഭാ തിരഞ്ഞെടുപ്പിന് ആഴ്‌ചകള്‍ മാത്രം ബാക്കി നില്‍ക്കേയാണ് അപര്‍ണ യാദവ് ബിജെപിയിലേക്ക് പോയത്. എന്നാലിത് തങ്ങള്‍ക്ക് വെല്ലുവിളിയാകില്ല എന്ന രീതിയിലായിരുന്നു അഖിലേഷിന്റെ പ്രതികരണം. അഖിലേഷ് യാദവിന്റെ സഹോദരനായ പ്രതീക് യാദവിന്റെ ഭാര്യയായ അപര്‍ണ ബുധനാഴ്‌ചയാണ് ബിജെപിയിലേക്ക് ചേക്കേറിയത്.
‘സമാജ്‌വാദി പാര്‍ട്ടിയുടെ ആശയങ്ങള്‍ പ്രചരിക്കുന്നതില്‍ സന്തോഷമുണ്ട്. എനിക്ക് ഉറപ്പുണ്ട്, ഞങ്ങളുടെ ആശയം ബിജെപിയില്‍ എത്തുമെന്നും അവിടെ ജനാധിപത്യം പുലരുമെന്നും’- അഖിലേഷ് പറഞ്ഞു. കൂടാതെ മുലായം സിംഗ് യാദവിന്റെ കുടുംബാംഗമായ പ്രമോദ് ഗുപ്‌തയും ബിജെപിയില്‍ ചേരുമെന്നാണ് റിപ്പോര്‍ട്.
യുപിയില്‍ ഫെബ്രുവരി 10നാണ് ഒന്നാം ഘട്ട തിരഞ്ഞെടുപ്പ്. രണ്ടാം ഘട്ടം ഫെബ്രുവരി 14നും മൂന്നാം ഘട്ടം ഫെബ്രുവരി 20നും നടക്കും. നാലാം ഘട്ടം ഫെബ്രുവരി 23നും അഞ്ചാം ഘട്ടം ഫെബ്രുവരി 27നും നടക്കും. ആറാം ഘട്ടം മാര്‍ച്ച് 3നും ഏഴാം ഘട്ടം മാര്‍ച്ച് 7നും നടക്കും. മാര്‍ച്ച് 10നാണ് വോട്ടെണ്ണല്‍.
Read also: രാജ്യത്ത് കോവിഡ് രൂക്ഷം; മാസ്‌ക് ധരിക്കാതെ കർണാടക മന്ത്രി
