ന്യൂഡെല്‍ഹി: നിയമസഭ തിരഞ്ഞെടുപ്പില്‍ എംപിമാര്‍ മല്‍സരിക്കേണ്ടതില്ലെന്ന് കോണ്‍ഗ്രസ് ഹൈക്കമാന്‍ഡ്. എംപിമാര്‍ക്ക് എംഎല്‍എ സ്‌ഥാനത്തേക്ക് മല്‍സരിക്കാന്‍ അനുമതി നല്‍കേണ്ടെന്ന് ഹൈക്കമാന്‍ഡില്‍ ധാരണയായി. ഒരു സംസ്‌ഥാനത്തും ഇതില്‍ ഇളവു വേണ്ടെന്നാണ് നിലവിലെ ധാരണ. പാര്‍ലമെന്റില്‍ കോണ്‍ഗ്രസ് അംഗസംഖ്യ കുറക്കാനാവില്ല എന്നാണ് ഹൈക്കമാന്‍ഡിന്റെ നിലപാട്.
നിയമസഭാ തിരഞ്ഞെടുപ്പിലേക്ക് എംപിമാരില്‍ ചിലര്‍ കേരളത്തില്‍ മല്‍സരിക്കുമെന്ന സൂചനകള്‍ നേരത്തെയുണ്ടായിരുന്നു. കെ മുരളീധരന്റെയും കെ സുധാകരന്റെയും അടൂര്‍ പ്രകാശിന്റെയും ബെന്നി ബെഹനാന്റെയും ഉള്‍പ്പെടെ പേരുകള്‍ മല്‍സര രംഗത്തേക്ക് ഉയര്‍ന്നു വന്നിരുന്നു. എന്നാല്‍, രാജ്യസഭയിലെയും ലോക്‌സഭയിലെയും അംഗസംഖ്യ വളരെ കുറവായ സാഹചര്യത്തില്‍ എംപിമാര്‍ മല്‍സരിക്കേണ്ട എന്നുതന്നെയാണ് ഹൈക്കമാന്‍ഡ് തീരുമാനിച്ചിരിക്കുന്നത്.
Read Also: കോവിഡ്; രാജ്യത്തെ ആകെ രോഗബാധിതരുടെ എണ്ണം 1.04 കോടി കടന്നു; 18,139 പുതിയ കേസുകള്‍
