തിരുവനന്തപുരം: സംസ്ഥാനത്ത് ഇന്ന് 4,230 ആരോഗ്യ പ്രവര്‍ത്തകര്‍ കോവിഡ്-19 വാക്‌സിന്‍ സ്വീകരിച്ചതായി ആരോഗ്യ വകുപ്പ് മന്ത്രി കെക ശൈലജ അറിയിച്ചു. 106 വാക്‌സിനേഷന്‍ കേന്ദ്രങ്ങളിലാണ് ഇന്ന് വാക്‌സിന്‍ കുത്തിവെപ്പ് ഉണ്ടായിരുന്നത്. തിരുവനന്തപുരം ജില്ലയിലാണ് ഏറ്റവും കൂടുതല്‍ (37) വാക്‌സിനേഷന്‍ കേന്ദ്രങ്ങൾ ഉണ്ടായിരുന്നത്. ആലപ്പുഴ 10, എറണാകുളം 18, കാസര്‍ഗോഡ് 1, കൊല്ലം 6, മലപ്പുറം 26, പത്തനംതിട്ട 1, തിരുവനന്തപുരം 37, തൃശൂര്‍ 7 എന്നിങ്ങനെയാണ് കോവിഡ് വാക്‌സിനേഷന്‍ കേന്ദ്രങ്ങളുടെ എണ്ണം.
തിരുവനന്തപുരം ജില്ലയിലാണ് ഏറ്റവും കൂടുതല്‍ ആരോഗ്യ പ്രവര്‍ത്തകര്‍ (1,398) വാക്‌സിന്‍ സ്വീകരിച്ചത്. ആലപ്പുഴ 208, എറണാകുളം 1,167, കാസര്‍ഗോഡ് 55, കൊല്ലം 458, മലപ്പുറം 503, പത്തനംതിട്ട 58, തിരുവനന്തപുരം 1,398, തൃശൂര്‍ 383 എന്നിങ്ങനെയാണ് ഇന്ന് വാക്‌സിന്‍ സ്വീകരിച്ചവരുടെ എണ്ണം. ഇതോടെ ആകെ 3,30,775 ആരോഗ്യ പ്രവര്‍ത്തകരാണ് വാക്‌സിന്‍ സ്വീകരിച്ചത്.
അതേസമയം, ആരോഗ്യ പ്രവര്‍ത്തകരുടെ വാക്‌സിനേഷന്‍ അന്തിമഘട്ടത്തിലായിട്ടുണ്ട്. കോവിഡ് മുന്നണി പോരാളികളുടെ ആദ്യ ഡോസ് വാക്‌സിനേഷന്‍ വ്യാഴാഴ്‌ച മുതല്‍ ആരംഭിക്കുന്നതാണ്. പോലീസ്, മറ്റ് സേനാവിഭാഗങ്ങള്‍, മുന്‍സിപ്പാലിറ്റി ജീവനക്കാര്‍, റവന്യൂ, പഞ്ചായത്ത് ജീവനക്കാര്‍ എന്നീ വിഭാഗങ്ങളിലെ മുന്നണി പോരാളികളെയാണ് ഇതില്‍ ഉള്‍പ്പെടുത്തിയിരിക്കുന്നത്.
Also Read: നിയമനങ്ങൾക്ക് രാഷ്‌ട്രീയമില്ല, മനുഷ്യത്വപരം; ആരോപണങ്ങൾക്ക് മറുപടിയുമായി മുഖ്യമന്ത്രി
