മസ്‌ക്കറ്റ് : ഒമാനില്‍ കോവിഡ് സ്‌ഥിരീകരിക്കുന്ന ആളുകളുടെ എണ്ണത്തില്‍ വര്‍ധന. കഴിഞ്ഞ ഇരുപത്തിനാല് മണിക്കൂറില്‍ 685 പേര്‍ക്ക് കൂടിയാണ് രാജ്യത്ത് പുതുതായി കോവിഡ് സ്‌ഥിരീകരിച്ചത്. ഇതോടെ രാജ്യത്തെ ആകെ രോഗികളുടെ എണ്ണം 106575 ആയി ഉയര്‍ന്നു. പ്രതിദിന രോഗബാധയില്‍ കഴിഞ്ഞ ദിവസങ്ങളേക്കാള്‍ വര്‍ധന തുടരുകയാണ്. ഒപ്പം തന്നെ 382 ആളുകള്‍ കൂടി രാജ്യത്ത് കോവിഡ് മുക്‌തരായിട്ടുണ്ട്. ഇതോടെ രാജ്യത്തെ ആകെ രോഗമുക്‌തരായ ആളുകളുടെ എണ്ണം 93222 ആയി ഉയര്‍ന്നിട്ടുണ്ട്.
രാജ്യത്തെ രോഗമുക്‌തി നിരക്ക് നിലവില്‍ 87.4 ശതമാനമാണ്. രാജ്യത്തിന്റെ വിവിധ ഭാഗങ്ങളിലായി 543 ആളുകളാണ് ഇപ്പോള്‍ ആശുപത്രിയില്‍ ചികില്‍സയില്‍ കഴിയുന്നത്. ഇവരില്‍ 213 ആളുകള്‍ തീവ്രപരിചരണ വിഭാഗത്തിലാണ്. രാജ്യത്ത് ഇതിനോടകം തന്നെ 1000 ന് മുകളില്‍ ആളുകള്‍ കോവിഡ് ബാധിച്ചു മരിച്ചിട്ടുണ്ട്. കഴിഞ്ഞ 24 മണിക്കൂറിനുള്ളില്‍ രാജ്യത്ത് കോവിഡ് ബാധിച്ചു മരിച്ച ആളുകളുടെ എണ്ണം 8 ആണ്. ഇതോടെ ആകെ 1046 പേരാണ് രാജ്യത്ത് കോവിഡ് ബാധിച്ചു മരിച്ചത്.
Read also : കുവൈത്ത് അമീറുമായി കൂടിക്കാഴ്‌ച നടത്തി കേന്ദ്രമന്ത്രി
