മലപ്പുറം: സമ്പൂർണ നിയന്ത്രണം ഏർപ്പെടുത്തിയതോടെ അതിഥി തൊഴിലാളികൾക്കുള്ള സംസ്‌ഥാന സർക്കാരിന്റെ ഭക്ഷ്യധാന്യ കിറ്റ് വിതരണം തിങ്കളാഴ്‌ച തുടങ്ങും. ജില്ലയിൽ 6000 തൊഴിലാളികൾക്ക് കിറ്റ് നൽകും. ലേബർ കമ്മീഷണറേറ്റിൽ നിന്ന്‌ നൽകിയ എണ്ണത്തിന്റെ അടിസ്‌ഥാനത്തിൽ സപ്ളൈകോയാണ്‌ കിറ്റ് പാക്ക് ചെയ്യുന്നത്.
അരി-അഞ്ച്‌ കിലോ, കടല-രണ്ട്‌ കിലോ, ആട്ട-രണ്ട്‌ കിലോ, സൺഫ്‌ളവർ ഓയിൽ- ഒരു ലിറ്റർ, ഉപ്പ്‌, പരിപ്പ്, സവാള, കിഴങ്ങ്‌ എന്നിവ ഒരു കിലോ വീതം, മുളക്‌പൊടി-100 ഗ്രാം, മാസ്‌ക്‌-അഞ്ച്‌ എണ്ണം തുടങ്ങിയ സാധനങ്ങളാണ്‌ കിറ്റിലുള്ളത്‌. തദ്ദേശ സ്‌ഥാപനങ്ങളിലെ വളന്റിയർമാർ മുഖേന അതിഥി തൊഴിലാളികൾ താമസിക്കുന്ന സ്‌ഥലത്ത്‌ കിറ്റുകൾ എത്തിക്കും. ഒറ്റപ്പെട്ട്‌ താമസിക്കുന്നവർക്കാണ്‌ കിറ്റ് നൽകുന്നത്‌.
നിർമാണ മേഖലയിലും വിവിധ സ്‌ഥാപനങ്ങളിലും പണിയെടുക്കുന്നവർക്ക്‌ കോൺട്രാക്‌ടർമാരും സ്‌ഥാപന മേധാവികളുമാണ്‌ സൗകര്യം ഒരുക്കേണ്ടത്‌. ജില്ലയിലെ സപ്ളൈകോയുടെ ആറ്‌ ഗോഡൗണുകളിലാണ്‌ കിറ്റുകൾ തയ്യാറാക്കുന്നത്‌. ഇവിടെനിന്ന്‌ അതത്‌ അസിസ്‌റ്റന്റ്‌ ലേബർ ഓഫീസർമാർ മുഖേന ഓരോ തദ്ദേശ സ്‌ഥാപനങ്ങളിലും എത്തിച്ച്‌ വിതരണം ചെയ്യും.
Read Also: എംഎൽഎമാരുടെ സത്യപ്രതിജ്‌ഞ 24ന് നടത്തിയേക്കും
