കോഴിക്കോട്: ചികിൽസയിൽ കഴിയുന്ന കെപിഎസി ലളിതയുടെ ആരോഗ്യനില മെച്ചപ്പെടുന്നതായി മകൻ സിദ്ധാർഥ്. ഫേസ്‌ബുക്കിലൂടെ ആയിരുന്നു സിദ്ധാർഥിന്റെ പ്രതികരണം.
“‘അമ്മ സുഖമായിരിക്കുന്നു. ആരോഗ്യനില മെച്ചപ്പെട്ട് കൊണ്ടിരിക്കുകയാണ്. പരിഭ്രമിക്കേണ്ട ആവശ്യമില്ല. നിങ്ങളുടെ പ്രാർഥനകൾക്കും കരുതലിനും സ്‌നേഹത്തിനും നന്ദി”; സിദ്ധാർഥ് കുറിച്ചു.
നിലവിൽ കൊച്ചിയിലെ സ്വകാര്യ ആശുപത്രിയിൽ തീവ്ര പരിചരണ വിഭാഗത്തിൽ ചികിൽസയിൽ കഴിയുകയാണ് കെപിഎസി ലളിത. കരൾ സംബന്ധമായ അസുഖമാണെന്നാണ് വിവരം. പത്ത് ദിവസങ്ങൾക്ക് മുൻപാണ് നടിയെ തൃശൂരിലെ ആശുപത്രിയിൽ പ്രവേശിപ്പിച്ചത്. എന്നാൽ കൂടുതൽ മെച്ചപ്പെട്ട ചികിൽസക്കായി കഴിഞ്ഞ ദിവസം എറണാകുളത്തെ സ്വകാര്യ ആശുപത്രിയിലേക്ക് മാറ്റുകയായിരുന്നു. കരൾ മാറ്റിവെക്കൽ ശസ്‌ത്രക്രിയ വേണ്ടിവരുമെന്നും ആശുപത്രി അധികൃതർ അറിയിച്ചിരുന്നു.
Also Read: ‘ബേബി ഡാം ബലപ്പെടുത്തണം’; കേരളത്തിന് കേന്ദ്രജല കമ്മീഷന്റെ കത്ത്
