മലപ്പുറം: എടക്കരയിൽ വളർത്തു നായയെ ഇരുചക്ര വാഹനത്തിന്റെ പുറകിൽ കെട്ടിവലിച്ച ഉടമ അറസ്‌റ്റിൽ. എടക്കര കരുനെച്ചി സ്വദേശി സേവ്യറിനെയാണ് എടക്കര പോലീസ് അറസ്‌റ്റ്‌ ചെയ്‌തത്‌.
മലപ്പുറം എടക്കര വെസ്‌റ്റ് പെരുംകുളത്താണ് സംഭവം നടന്നത്. പെരുങ്കുളം മുതൽ മുസ്ള്യാരങ്ങാടി വരെ മൂന്ന് കിലോമീറ്ററോളം ദൂരത്തിലാണ് തിരുനെച്ചി സ്വദേശി സേവ്യര്‍ വളര്‍ത്തുനായയെ ഇരുചക്ര വാഹനത്തിൽ കെട്ടി വലിച്ചത്. ക്രൂരത നാട്ടുകാരുടെ ശ്രദ്ധയില്‍ പെട്ടതിനെ തുടര്‍ന്ന് ചിലര്‍ പിന്തുടർന്ന് വിലക്കിയെങ്കിലും ഇയാള്‍ അവഗണിച്ചു വാഹനം മുന്നോട്ടു കൊണ്ടുപോയി.
കൂടുതൽ നാട്ടുകാർ സംഘടിച്ചതോടെ ഇയാൾ സ്‌കൂട്ടറിൽ നിന്ന് നായയുടെ കെട്ടഴിച്ച് മാറ്റി. നായയെ ഉപേക്ഷിക്കാൻ കൊണ്ടുപോയതാണ് എന്നാണ് ഇയാൾ പറഞ്ഞത്. നായക്ക് പരിക്കേറ്റിട്ടുണ്ട്. സംഭവം ശ്രദ്ധയിൽ പെട്ട സന്നദ്ധ പ്രവർത്തകരാണ് പോലീസിൽ പരാതി നല്‍കിയത്. നായയെ പിന്നീട് സന്നദ്ധ സംഘടന ഏറ്റെടുത്തു. ഏതാനും മാസം മുമ്പാണ് സേവ്യർ നായയെ വളർത്താൻ ആരംഭിച്ചത്.
Also Read: കോഴിക്കോട് ജില്ലയില്‍ ഇന്ന് കര്‍ശന നിയന്ത്രണം
