ന്യൂഡെൽഹി: 2024ലെ ലോക്‌സഭാ തിരഞ്ഞെടുപ്പ് അടുത്തിരിക്കെ രജിസ്‌റ്റർ ചെയ്‌ത വോട്ടർമാരുടെ കണക്കുകൾ പുറത്തുവിട്ട് തിരഞ്ഞെടുപ്പ് കമ്മീഷൻ. ഇതുവരെ 96.88 കോടി വോട്ടർമാരാണ് രജിസ്‌റ്റർ ചെയ്‌തിട്ടുള്ളതെന്ന് കമ്മീഷൻ അറിയിച്ചു. കഴിഞ്ഞ തവണത്തേക്കാൾ 7.2 കോടി വോട്ടർമാരാണ് ഇക്കുറി കൂടുതലുള്ളത്.
18-29 പ്രായപരിധിയിലുള്ള രണ്ടുകോടിയിലധികം പേരാണ് ഇത്തവണ രജിസ്‌റ്റർ ചെയ്‌തിരിക്കുന്നത്‌. ആകെയുള്ള വോട്ടർമാരിൽ കൂടുതൽ പുരുഷ വോട്ടർമാരാണ്. 49.72 കോടി പുരുഷ വോട്ടർമാരും 47.15 കോടി വനിതാ വോട്ടർമാരുമാണുള്ളത്. 18-29 വയസിലുള്ള 1,84,81,160 വോട്ടർമാരും 20-29 വയസിലുള്ള 19,74,37,160 വോട്ടർമാരുമാണുള്ളത്.
അതേസമയം, ജമ്മു കശ്‌മീരിലെയും അസമിലെയും വോട്ടർപട്ടിക പുതുക്കലും വിജയകരമായി പൂർത്തിയാക്കിയതായി കമ്മീഷൻ അറിയിച്ചു. ജമ്മു കശ്‌മീരിൽ ആകെ 86,94,992 വോട്ടർമാരും അസമിൽ 2,43,01,960 വോട്ടർമാരുമുണ്ട്. ലോക്‌സഭാ തിരഞ്ഞെടുപ്പിന്റെ തീയതി പ്രഖ്യാപിക്കാനിരിക്കേയാണ് തിരഞ്ഞെടുപ്പ് കമ്മീഷൻ കണക്കുകൾ പുറത്തുവിട്ടത്.
Most Read| ലോകത്തിലെ ഏറ്റവും മനോഹരമായ ബീച്ചുകളിൽ ഇടംനേടി പാപനാശവും
