അബുദാബി: തിമിംഗലത്തിന്റെ മുതുകിൽ കയറി സൗദി യുവാവിന്റെ സാഹസിക യാത്ര. സൗദി അറേബ്യയിലെ തുറമുഖ നഗരമായ യാൻബുവിലാണ് സംഭവം. യുവാവ് തിമിംഗല സ്രാവിന്റെ പുറത്തുകയറി സവാരി നടത്തുന്ന വീഡിയോ ദൃശ്യങ്ങൾ സോഷ്യൽ മീഡിയയിൽ വൈറലായി.
സാകി അൽ സബാഹി എന്നയാളാണ് തിമിംഗല സ്രാവിന്റെ മുതുകിൽ കയറി സവാരി നടത്തിയത്. ഒരു ബോട്ടിൽ ഇയാൾ ഇരിക്കുന്നതും തിമിംഗല സ്രാവുകൾ നീന്തുന്നത് നോക്കി നിൽക്കുന്നതും വീഡിയോയിൽ കാണാം. പിന്നീട് ഒരു തിമിംഗല സ്രാവ് ബോട്ടിന് അടുത്തേക്ക് വരുമ്പോൾ ഇയാൾ വെള്ളത്തിലേക്ക് ചാടിയിറങ്ങുകയും തിമിംഗലത്തിന്റെ മുതുകിൽ കയറുകയുമായിരുന്നു. മുതുകിയിൽ കയറിയ യുവാവിനേയുംകൊണ്ട് തിമിംഗല സ്രാവ് നീന്തിപ്പോകുന്നതും വീഡിയോയിൽ കാണാം.
ഒപ്പമുണ്ടായിരുന്ന സുഹൃത്ത് അൽ സബാഹിയെ വിലക്കാൻ ശ്രമിക്കുന്നുണ്ട്. അതിന് താങ്കളെ വിഴുങ്ങാൻ സാധിക്കുമെന്നും ശ്രദ്ധിക്കണമെന്നും സുഹൃത്ത് മുന്നറിയിപ്പു നൽകുന്നതും വീഡിയോയിൽ ഉണ്ട്.
ട്വിറ്ററിൽ വീഡിയോ പോസ്റ്റ് ചെയ്തതിനു പിന്നാലെ യുവാവിന്റെ സാഹസികതയെ അഭിനന്ദിച്ചും വിമർശിച്ചും നിരവധി പേർ രംഗത്തെത്തി. 14,000ത്തോളം പേരാണ് വീഡിയോ കണ്ടത്. നിരവധി കമന്റുകളും വീഡിയോക്ക് ലഭിച്ചിട്ടുണ്ട്.
