മലപ്പുറം: സ്ത്രീത്വത്തെ അപമാനിച്ച എംഎസ്എഫ് നേതാക്കൾക്കെതിരെ പരാതിപ്പെട്ട ഹരിത സംസ്ഥാന കമ്മിറ്റിയെ മരവിപ്പിച്ചതിന് പിന്നാലെ പ്രതിസന്ധി കടുക്കുന്നു. ഹരിത സംസ്ഥാന ഭാരവാഹികൾ രാജിവെക്കാനാണ് പുതിയ തീരുമാനം. പ്രഖ്യാപനം നാളത്തെ വാർത്താ സമ്മേളനത്തിൽ നടത്തും.
ജില്ലാ കമ്മിറ്റികളും രാജി സന്നദ്ധത അറിയിച്ചിട്ടുണ്ട്. വാർത്താ സമ്മേളനം നാളെ ഉച്ചക്ക് 12ന് നടത്തുമെന്ന് എംഎസ്എഫ് ഹരിത നേതാവ് ഫാത്തിമ തഹ്ലിയ ഫേസ്ബുക്കിലൂടെ അറിയിച്ചു. അതേസമയം, വിഷയത്തിൽ എംഎസ്എഫിലും പൊട്ടിത്തെറി ഉണ്ടായിരിക്കുകയാണ്. പാർട്ടിയുടെ സ്ത്രീവിരുദ്ധ നടപടിയിൽ പ്രതിഷേധിച്ച് സംസ്ഥാന സീനിയർ വൈസ് പ്രസിഡണ്ട് എപി അബ്ദു സമദ് രാജി സമർപ്പിച്ചു. സംസ്ഥാന, ജില്ലാ ഭാരവാഹിത്വം വഹിക്കുന്ന കൂടുതൽ പേർ രാജി സമർപ്പിക്കുമെന്നാണ് വിവരം.
സംസ്ഥാന പ്രസിഡണ്ട് പികെ നവാസിനെ അനുകൂലിക്കുന്നവർ വാട്സാപ് ഗ്രൂപ്പുകളിലൂടെ ഹരിത നേതാക്കൾക്കെതിരെ അധിക്ഷേപം തുടരുന്നതിൽ പ്രതിഷേധിച്ചാണ് നടപടി.
Also Read: അഫ്ഗാനിൽ കുടുങ്ങിയ മലയാളികളെ തിരിച്ചെത്തിക്കണം; കേന്ദ്രത്തിന് കത്തയച്ച് കേരളം