തിരുവനന്തപുരം: റീജിയണൽ കാന്സര് സെന്ററില് ഓക്സിജന് ക്ഷാമം. ഇന്ന് എട്ട് ശസ്ത്രക്രിയകള് മാറ്റിവെച്ചു. സിലിണ്ടര് വിതരണത്തിലെ അപാകതയാണ് ഓക്സിജന് ക്ഷാമത്തിന് കാരണം. ഒരു സിലിണ്ടര് പോലും ലഭിക്കാതെ വന്നതിനാലാണ് ഇന്ന് ശസ്ത്രക്രിയകള് മുടങ്ങിയത്.
ഒരു ദിവസം ആശുപത്രിയില് വേണ്ടത് 65 മുതല് 70 വരെ ഓക്സിജന് സിലിണ്ടറുകളാണ്. എന്നാല് കഴിഞ്ഞ ദിവസങ്ങളില് 35 സിലിണ്ടറുകള് വരെ മാത്രമേ ലഭിച്ചിരുന്നുള്ളൂ. അടിയന്തര പ്രാധാന്യമുള്ള ശസ്ത്രക്രിയകള് മാത്രം നടത്തി മറ്റ് ശസ്ത്രക്രിയകള് വെട്ടിക്കുറച്ച് പരിഹാരം കാണുകയായിരുന്നു.
ഓക്സിജന് വിതരണത്തിലെ അപാകത പരിഹരിക്കണമെന്ന് ആവശ്യപ്പെട്ട് ആരോഗ്യ സെക്രട്ടറിക്കും ജില്ലാ ഭരണകൂടം സജ്ജമാക്കിയ ഓക്സിജന് വാര് റൂമിലും ആര്സിസി ഡയറക്ടർ കത്ത് നല്കിയിട്ടുണ്ട്. നേരത്തെ തിരുവനന്തപുരത്തെ ശ്രീചിത്ര ഇന്സ്റ്റിറ്റ്യൂട്ട് ഓഫ് മെഡിക്കല് സയന്സിലും ഓക്സിജന് ക്ഷാമത്തെ തുടർന്ന് ശസ്ത്രക്രിയകള് മാറ്റിവെച്ചിരുന്നു.
Read Also: പോസിറ്റീവ് സർട്ടിഫിക്കറ്റ് ഇല്ലെങ്കിലും കോവിഡ് ചികിൽസ നൽകണം; മാർഗരേഖ പുതുക്കി കേന്ദ്രം