ന്യൂഡെൽഹി: നടൻ സിദ്ധാർഥിന് പിന്തുണയുമായി കോൺഗ്രസ് എംപി ശശി തരൂർ. സിനിമയിലെ വില്ലന്മാരേക്കാള് സമൂഹത്തിലെ വില്ലന്മാര് ഭീകരന്മാരാണ്. അതിനെതിരെ പ്രതികരിക്കാന് സിദ്ധാര്ഥിനെ പോലുള്ളവർക്ക് മാത്രമേ കഴിയൂവെന്ന് തരൂർ പറഞ്ഞു. കേന്ദ്ര സർക്കാരിന്റെ നയങ്ങളെ വിമർശിക്കുന്നതിന്റെ പേരിൽ തനിക്കും കുടുംബത്തിനും എതിരെ ബിജെപിയുടെ വധഭീഷണിയുണ്ടെന്ന വെളിപ്പെടുത്തലിന് പിന്നാലെയാണ് സിദ്ധാർഥിന് പിന്തുണയുമായി തരൂർ രംഗത്ത് എത്തിയത്.
“എന്തുകൊണ്ടാണ് സിനിമയില് കാണുന്ന നായകന്മാര് തീവ്രമായ പ്രൊപ്പഗാണ്ടകള്ക്ക് എതിരെ ശബ്ദം ഉയര്ത്താത്തതെന്ന് നമ്മള് ചിന്തിക്കാറുണ്ട്. നമ്മുടെ സമൂഹത്തിലുള്ള വില്ലന്മാര് സിനിമയില് ഉള്ളവരേക്കാള് ഭയാനകമാണ്. അത് ഈ നായകന്മാര്ക്ക് താങ്ങാനാവില്ല എന്നതാണ് കാരണം. സിദ്ധാര്ഥിനെ പോലുള്ളവർക്കേ അതിന് കഴിയൂ”, ശശി തരൂർ ട്വീറ്റ് ചെയ്തു.
We often wonder why our on-screen heroes don’t speak up, or cravenly spout propaganda. One reason: the off-screen villains that our society projects & protects turn out to be more threatening than these heroes can handle. Except for a rare someone like @Actor_Siddharth. #Respect https://t.co/ER8Vayhh1m
— Shashi Tharoor (@ShashiTharoor) April 30, 2021
തമിഴ്നാട് ബിജെപി പ്രവർത്തകർ തന്റെ മൊബൈൽ നമ്പർ ചോർത്തിയെന്നും 24 മണിക്കൂറിനിടെ തനിക്കും കുടുംബത്തിനും നേരെ 500ഓളം കൊലപാതക, ബലാൽസംഗ ഭീഷണികളാണ് വന്നതെന്നും സിദ്ധാർഥ് കഴിഞ്ഞ ദിവസം പറഞ്ഞിരുന്നു. “എന്റെ ഫോൺ നമ്പർ തമിഴ്നാട് ബിജെപിയും ബിജെപി ഐടി സെല്ലും ചോർത്തി. 24 മണിക്കൂറിനിടെ 500ൽ അധികം കൊലപാതക, ബലാൽസംഗ ഭീഷണി സന്ദേശങ്ങളാണ് എനിക്കും എന്റെ കുടുംബത്തിനും ലഭിച്ചത്. എല്ലാ നമ്പറുകളും (ബിജെപി ബന്ധമുള്ളവയാണ്) പോലീസിന് കൈമാറി. ഞാൻ നിശബ്ദനാകില്ല. ശ്രമിച്ചുകൊണ്ടിരിക്കും,”- പ്രധാനമന്ത്രി നരേന്ദ്രമോദിയെയും ആഭ്യന്തരമന്ത്രി അമിത് ഷായെയും ടാഗ് ചെയ്തുകൊണ്ട് സിദ്ധാർഥ് ട്വീറ്റ് ചെയ്തിരുന്നു.
‘ഇവൻ ഇനിമേല വായ തുറക്ക കൂടാത്’ (ഇവൻ ഇനിയൊരിക്കലും വായ് തുറക്കാൻ പാടില്ല) എന്ന് ബിജെപി പ്രവർത്തകർ ആഹ്വാനം ചെയ്യുന്ന മറ്റൊരു ട്വീറ്റും സിദ്ധാർഥ് പങ്കുവച്ചു. ‘നമ്മൾ കോവിഡിനെ അതിജീവിച്ചേക്കാം എന്നാൽ ഇത്തരക്കാരെ അതിജീവിക്കുമോ’ എന്നും തന്റെ കുറിപ്പിൽ സിദ്ധാർഥ് കൂട്ടിച്ചേർത്തു.
ഇതിന് പിന്നാലെ നിരവധി പേരാണ് സിദ്ധാർഥിന് പിന്തുണയുമായി എത്തിയത്. നിലപാടിൽ നിന്ന് വ്യതിചലിക്കരുതെന്നും തങ്ങളുടെ ഒരു സൈന്യം തന്നെ പിന്തുണയുമായി ഒപ്പമുണ്ടെന്നും നടി പാർവതി തിരുവോത്ത് ട്വീറ്റ് ചെയ്തിരുന്നു.
Also Read: വിലക്കുറവിൽ വഞ്ചിതരാകരുത്; ഓൺലൈൻ തട്ടിപ്പ് വ്യാപകം; വലയിൽ വീണവരിൽ മുൻ ഡിജിപിയും