പുതിയ ബ്രാൻഡ് ഐഡന്റിറ്റി പ്രഖ്യാപിച്ച് ടാറ്റ മോട്ടോഴ്സ്. ഇനിമുതൽ കമ്പനിയുടെ പാസഞ്ചർ കാറുകൾ ‘Tata.cars’ എന്ന ബ്രാൻഡ് നാമത്തിലാണ് അറിയപ്പെടുക. പെട്രോൾ, ഡീസൽ, സിഎൻജി തുടങ്ങിയ പരമ്പരാഗത ഇന്ധന മോഡലുകളും ഇലക്ട്രിക് വാഹനങ്ങളും ഇനി ഒരൊറ്റ കുടക്കീഴിൽ ‘ടാറ്റ.കാർസ്’ എന്ന പേരിൽ അണിനിരക്കും.
നിലവിലുള്ള Tata.ev എന്ന ബ്രാൻഡിങ് ഇതിന് കീഴിലുള്ള ഒരു ഉപ ബ്രാൻഡായി തുടർന്നും പ്രവർത്തിക്കും. റീട്ടെയിൽ വിപണിയിൽ പുതിയ ഐഡന്റിറ്റി അവതരിപ്പിച്ചെങ്കിലും കമ്പനിയുടെ ഔദ്യോഗിക കോർപ്പറേറ്റ് ഘടനയിൽ യാതൊരു മാറ്റവുമില്ല. നിർമാണ പ്ളാന്റുകൾ, ഔദ്യോഗിക കരാറുകൾ, നിയമപരമായ ഫയലിംഗുകൾ എന്നിവയ്ക്കെല്ലാം ടാറ്റ മോട്ടർ പാസഞ്ചർ വെഹിക്കിൾസ് എന്ന രജിസ്റ്റർ ചെയ്ത പേര് തന്നെ മാറ്റമില്ലാത്ത തുടരും.
ഉപഭോക്തൃ തലത്തിലുള്ള വിൽപ്പന, പരസ്യങ്ങൾ, ഡിജിറ്റൽ പ്ളാറ്റ്ഫോമുകൾ എന്നിവയിൽ മാത്രമാണ് പുതിയ പേര് പ്രധാനമായും ഉപയോഗിക്കുക. ഇന്ത്യൻ ജനങ്ങൾ വർഷങ്ങളായി ടാറ്റയുടെ കാറുകളെ ടാറ്റ കാർസ് എന്ന് തന്നെയാണ് സാധാരണയായി വിളിക്കാറുള്ളതെന്നും ആ പേര് ഇപ്പോൾ ഔദ്യോഗികമായി സ്വീകരിക്കുകയാണെന്നും ടാറ്റ മോട്ടോഴ്സ് മാനേജിങ് ഡയറക്ടർ ശൈലേഷ് ചന്ദ്ര വ്യക്തമാക്കി.
Most Read| ‘മിസ് യൂണിവേഴ്സ് ഇന്ത്യ 2026’ കിരീടം ചൂടി കേരളത്തിൽ നിന്നുള്ള കസിയ ലിസ് മേജോ
