തൃശൂർ : കോവിഡ് വ്യാപനത്തെ തുടർന്ന് ഗുരുവായൂർ ക്ഷേത്രത്തിൽ വിവാഹങ്ങൾക്ക് ഏർപ്പെടുത്തിയിരുന്ന വിലക്ക് പിൻവലിച്ചു. ഇതേ തുടർന്ന് ക്ഷേത്രത്തിൽ ബുക്ക് ചെയ്‌തിരുന്ന എല്ലാ വിവാഹങ്ങളും നാളെ മുതൽ നടത്താൻ അനുമതി ഉണ്ട്. അതേസമയം തന്നെ രോഗവ്യാപനം നിലനിൽക്കുന്ന സാഹചര്യത്തിൽ കർശന നിയന്ത്രണങ്ങൾ പാലിച്ചുകൊണ്ട് മാത്രമേ വിവാഹങ്ങൾ നടത്താൻ അനുമതി നൽകുകയുള്ളൂ.
ഓരോ വിവാഹ സംഘത്തിലും 12 പേർക്കാണ് പങ്കെടുക്കാൻ അവസരം ഉണ്ടാകുക. നാളെ മാത്രം ക്ഷേത്രത്തിൽ 40 വിവാഹങ്ങളും, ഞായറാഴ്‌ച 140 വിവാഹങ്ങളും ഇതുവരെ ബുക്ക് ചെയ്‌തിട്ടുണ്ട്‌. കോവിഡ് മാനദണ്ഡങ്ങൾ കൃത്യമായി പാലിച്ചുകൊണ്ട് ഇവ ക്ഷേത്രത്തിൽ നടത്താം.
കോവിഡ് വ്യാപനം രൂക്ഷമായ സാഹചര്യത്തിലാണ് ക്ഷേത്രത്തിലെ വിവാഹച്ചടങ്ങുകൾക്ക് വിലക്ക് ഏർപ്പെടുത്തിയത്. എന്നാൽ വിലക്ക് ഏർപ്പെടുത്തിയതിൽ വലിയ പരാതിയാണ് പിന്നീട് ഉയർന്നത്. ഇതിനെ തുടർന്നാണ് ഇന്ന് രാവിലെയോടെ കളക്‌ടർ വിലക്ക് പിൻവലിച്ചുകൊണ്ട് ഉത്തരവ് പുറത്തിറക്കിയത്.
Read also : ആശങ്കയിൽ രാജ്യം; പ്രതിദിന കോവിഡ് കേസുകൾ മൂന്നര ലക്ഷത്തിലേക്ക്
