കൊച്ചി: എഐ ക്യാമറയുടെ മറവില് നടന്നിരിക്കുന്നത് വിചിത്രമായ തട്ടിപ്പാണെന്ന് പ്രതിപക്ഷ നേതാവ് വിഡി സതീശന്. പദ്ധതിയില് 100 കോടിയുടെ അഴിമതി നടന്നു. ഉപകരണങ്ങളുടെ ആകെ ചെലവ് 57 കോടി മാത്രമാണ് കണക്കാക്കിയത്. ഇതാണ് 151 കോടിയുടെ കരാറില് എത്തിയതെന്നും അദ്ദേഹം വാര്ത്താ സമ്മേളനത്തില് ആരോപിച്ചു.
‘കണ്ട്രോള് റൂമടക്കം എല്ലാ ഉപകരണങ്ങളും ഉള്പ്പടെ 57 കോടിയാണ് ട്രോയിസ് പ്രൊപോസ് നല്കിയിരിക്കുന്നത്. അതു തന്നെ യഥാർഥത്തിൽ 45 കോടിക്ക് ചെയ്യാന് പറ്റുന്നതാണ്. എന്നാല് 151 കോടിക്കാണ് ടെന്ഡര് നല്കിയത്. എസ്ആര്ഐടിക്ക് ആറ് ശതമാനം വെറുതെ കമ്മീഷന് കിട്ടി. ബാക്കി തുക എല്ലാവരും കൂടി വീതിച്ചെടുക്കാനായിരുന്നു പദ്ധതി’- സതീശന് വാര്ത്താ സമ്മേളനത്തില് പറഞ്ഞു.
ഉപകരാറിനായി രൂപവൽകരിച്ച കണ്സോര്ഷ്യത്തിന്റെ യോഗത്തില് മുഖ്യമന്ത്രിയുടെ മകന്റെ ഭാര്യാ പിതാവായ പ്രകാശ് ബാബു പങ്കെടുത്തുവെന്നും സതീശന് ആരോപിച്ചു. പ്രകാശ് ബാബുവാണ് യോഗത്തില് ഏറ്റവും കൂടുതല് സമയം സംസാരിച്ചതെന്നും ഇത് സ്വപ്ന പദ്ധതിയാണെന്ന് കമ്പനി പ്രതിനിധികളോട് പറഞ്ഞതായും സതീശന് പറഞ്ഞു.
അന്വേഷണം നടത്തിയാല് മുഖ്യമന്ത്രിയുടെ ബന്ധു പങ്കെടുത്തതിന്റെ രേഖ ഹാജരാക്കുമെന്നും പ്രതിപക്ഷ നേതാവ് വാർത്താ സമ്മേളനത്തിൽ പറഞ്ഞു.
Read Also: മലമ്പുഴയിൽ കാട്ടാനയുടെ ആക്രമണത്തിൽ ഒരാൾക്ക് പരിക്ക്