കണ്ണൂർ: മുസ്‌ലിം ലീഗ് ജില്ലാ ഭാരവാഹി യോഗത്തിൽ യൂത്ത്‌ലീഗ് പ്രവർത്തകരുടെ പ്രതിഷേധം. വിജിലൻസ് കേസിൽപ്പെട്ട ജില്ലാ ജനറൽ സെക്രട്ടറി അബ്‌ദുൾ കരിം ചേലേരി ഉൾപ്പടെയുള്ളവരെ പുറത്താക്കണം എന്ന മുദ്രാവാക്യം ഉയർത്തിയാണ് അമ്പതോളം യൂത്ത്‌ലീഗ് പ്രവർത്തകർ യോഗം അലങ്കോലമാക്കിയത്.
ചന്ദ്രിക ക്യാമ്പയിനുമായി ബന്ധപ്പെട്ട് കണ്ണൂർ കാൾ ടെക്‌സിലെ ലീഗ് ജില്ലാകമ്മിറ്റി ഓഫിസായ ബാഫഖി തങ്ങൾ സ്‌മാരക സൗധത്തിൽ നടന്ന യോഗത്തിലാണ് യൂത്ത്‌ലീഗ് പ്രവർത്തകർ പ്രതിഷേധവുമായി എത്തിയത്. കമ്പിൽ എൻആർഐ റിലീഫ് കോ-ഓപ്പറേറ്റീവ് സൊസൈറ്റിയിൽ വൻ ക്രമക്കേട് കണ്ടെത്തിയിരുന്നു. സൊസൈറ്റിയുടെ മറവിൽ സഹകരണ സംഘം ഉണ്ടാക്കി മണൽ വാരിയതിൽ 43 ലക്ഷം രൂപയുടെ ക്രമക്കേട് നടത്തിയെന്നാണ് കേസ്.
സംഭവത്തിൽ ജില്ലാ ജനറൽ സെക്രട്ടറി അബ്‌ദുൾ കരിം ചേലേരി ഉൾപ്പടെ പത്ത് പേർക്കെതിരെ വിജിലൻസ് ഡയറക്‌ടർ കേസെടുത്തിരുന്നു. വിജിലൻസ് കേസിൽ ഉൾപ്പെട്ട അബ്‌ദുൾ കരിം ചേലേരി, മഹമ്മൂദ് അള്ളാകുളം, ഇബ്രാഹിംകുട്ടി തിരുവട്ടൂർ, മുസ്‌തഫ എന്നിവരെ പുറത്താക്കണമെന്നായിരുന്നു പ്രതിഷേധക്കാരുടെ ആവശ്യം.
Read Also: സംസ്‌ഥാനത്തെ ഭവനരഹിതരായ എല്ലാവർക്കും വീട്; മന്ത്രി കെ രാജൻ
