കരിപ്പൂര്‍: കളിക്കിടയില്‍ 3 വയസുകാരന്റെ തല അലൂമിനിയം കലത്തിനുള്ളില്‍ കുടുങ്ങി. വിമാനത്താവളത്തിലെ അഗ്നിശമന രക്ഷാസേന കലം മുറിച്ചെടുത്ത് കുട്ടിയെ രക്ഷപ്പെടുത്തി.
കരിപ്പൂര്‍ വിമാനത്താവള പരിസരത്തു താമസിക്കുന്ന കുട്ടിയാണ് അപകടത്തില്‍ പെട്ടത്. പാത്രത്തിനുള്ളില്‍ നിന്നും തല പുറത്തെടുക്കാന്‍ ശ്രമിച്ചെങ്കിലും ഫലം കാണാതെ കൊണ്ടോട്ടിയിലെ സ്വകാര്യ ആശുപത്രിയില്‍ മാതാപിതാക്കള്‍ എത്തിച്ചു. എന്നാല്‍ ആശുപത്രിയില്‍ നിന്ന് അഗ്നിശമന സേനയുടെ സഹായം തേടാന്‍ നിര്‍ദേശിക്കുകയായിരുന്നു. തുടര്‍ന്നാണു മാതാപിതാക്കള്‍ മൂന്നു വയസ്സുകാരനുമായി വിമാനത്താവളത്തിലെത്തിയത്. അഗ്നിശമന രക്ഷാസേനാ വിഭാഗം ഉദ്യോഗസ്ഥര്‍ പാത്രത്തിന്റെ ഒരു വശം മുറിച്ചെടുത്ത്, പരുക്കേല്‍ക്കാതെ കുട്ടിയെ രക്ഷപ്പെടുത്തി.
ഉദ്യോഗസ്ഥരായ പി.സൈനുദ്ദീന്‍, വി.അലക്സ്, എ.നജീബ്, പി.കെ.റഹ്മത്തുല്ല, ഇ.എ.ഷുക്കൂര്‍, പി.എം.എ.റഹീം, വിഷ്ണുദാസ്, യൂസഫ്, എസ്.ഫാബിന്‍, വി.ജിതേഷ് എന്നിവരുടെ നേതൃത്വത്തിലാണു കുട്ടിയെ രക്ഷപ്പെടുത്തിയത്.
