ചെറായി: 500 കിലോയോളം ഭാരം..12 അടിയിലധികം നീളം..നീണ്ട ചുണ്ട്.. കാഴ്‌ചയിൽ ഭീമൻ ആണെങ്കിലും വലയിലാവാൻ ആയിരുന്നു യോഗം. പറഞ്ഞുവരുന്നത് ആഴക്കടല്‍ മൽസ്യബന്ധന ബോട്ടിനു ലഭിച്ച കൂറ്റന്‍ ഓലക്കൊടിയനെ കുറിച്ചാണ്. രൂപത്തിലും വലിപ്പത്തിലും അൽഭുതമാവുകയാണ് കഴിഞ്ഞ ദിവസം മുനമ്പം ഹാര്‍ബറില്‍ ലേലത്തിനായി വെച്ച ഭീമന്‍ ഓലക്കൊടിയന്‍ മൽസ്യം.
രണ്ട് ട്രോളികള്‍ ചേര്‍ത്ത് വെച്ച് അതില്‍ കിടത്തിയാണ് ഈ ഭീമന്‍ ഓലക്കൊടിയനെ ബോട്ടില്‍ നിന്നും ഇറക്കി ലേല ഹാളില്‍ എത്തിച്ചത്. നീണ്ട ചുണ്ട് കൂടാതെ തന്നെ എതാണ്ട് 12 അടിക്ക് മേല്‍ നീളം വരും. മൽസ്യ മാര്‍ക്കറ്റുകളില്‍ കിലോക്ക് 250 രൂപ വരെ വില വരുന്ന ഈ മൽസ്യം ഹോട്ടലുകാരാണ് കൂടുതലും വാങ്ങാറ്. രുചിയേറിയതും ഉറച്ചതുമാണ് ഇതിന്റെ മാംസം എന്നതാണ് ഓലക്കൊടിയന്റെ പ്രത്യേകത.
പൊതുവേ വലിയ മീനാണ് ഓലക്കൊടിയന്‍. മിക്കവാറും എല്ലാ ഹാര്‍ബറിലും എത്താറുണ്ടെങ്കിലും ഇത്രയും വലിപ്പമുള്ളത് ഏറെ കാലത്തിന് ശേഷമാണ് ലഭിക്കുന്നതെന്ന് മൽസ്യത്തൊഴിലാളികള്‍ പറഞ്ഞു.
Most Read: മനുഷ്യരെ കടത്തിവെട്ടും; താരമായി ഗോൾഫ് കാർട്ട് വാഹനം ഓടിക്കുന്ന ഒറാങ്ങുട്ടാൻ
