കോട്ടയം: ആശുപത്രി ജീവനക്കാരിയുടെ വേഷത്തിലെത്തി കോട്ടയം മെഡിക്കൽ കോളേജിൽ നിന്നും നവജാത ശിശുവിനെ തട്ടിക്കൊണ്ട് പോകാൻ ശ്രമം. ചികിൽസക്കെന്ന പേരിൽ നഴ്‌സിന്റെ വേഷത്തിലെത്തിയ ഒരു സ്‌ത്രീ കുഞ്ഞിനെ കൊണ്ട് പോകുകയായിരുന്നു. തുടർന്ന് നടത്തിയ തിരച്ചിലിനൊടുവിലാണ് കുട്ടിയെ ആശുപത്രി പരിസരത്ത് നിന്നും കണ്ടെത്തിയത്.
ഇടുക്കി മുണ്ടക്കയം സ്വദേശിനിയായ യുവതിയുടെ 3 ദിവസം പ്രായമായ കുഞ്ഞിനെയാണ് തട്ടികൊണ്ട് പോകാൻ ശ്രമം നടന്നത്. കുട്ടിയെ ചികിൽസയ്‌ക്കായി കൊണ്ട് പോയി ഏറെ നേരം കഴിഞ്ഞിട്ടും തിരികെ ലഭിക്കാഞ്ഞതോടെ മാതാപിതാക്കൾ കുട്ടിയെ അന്വേഷിക്കുകയായിരുന്നു. എന്നാൽ കുട്ടിയെ തങ്ങൾക്ക് ലഭിച്ചിട്ടില്ലെന്ന് ആശുപത്രി അധികൃതർ അറിയിച്ചു. തുടർന്ന് ഇവർ പോലീസിൽ വിവരം അറിയിക്കുകയായിരുന്നു.
ആശുപത്രി ജീവനക്കാരിയുടെ വേഷത്തിയ സ്‌ത്രീയാണ് കുട്ടിയെ തട്ടികൊണ്ട് പോയതെന്ന് പോലീസിന് മൊഴി നൽകി. തുടർന്ന് നടത്തിയ തിരച്ചിലിൽ ആശുപത്രിക്ക് പുറത്തുള്ള ഹോട്ടലിന് സമീപത്ത് നിന്നും കുട്ടിയെ കണ്ടെത്തുകയായിരുന്നു. തുടർന്ന് കുഞ്ഞിനെ അമ്മക്ക് കൈമാറി.
Read also: കൈക്കൂലി വാങ്ങുന്നതിനിടെ വില്ലേജ് ഓഫിസ് ഫീൽഡ് ഉദ്യോഗസ്‌ഥർ പിടിയിൽ
