ഡെല്ഹി: ‘ഡെല്ഹി ചലോ മാര്ച്ചി’നിടെ കര്ഷകര്ക്ക് എതിരെ പോലീസ് പ്രയോഗിച്ച ജലപീരങ്കി ഓഫ് ചെയ്ത യുവാവിനെതിരെ കൊലപാതക ശ്രമത്തിന് കേസെടുത്ത് ഡെല്ഹി പൊലീസ്. ജലപീരങ്കിക്ക് മുകളില് കയറി അത് ഓഫ് ചെയ്യുന്ന യുവാവിന്റെ ദൃശ്യങ്ങള് സമൂഹ മാദ്ധ്യമങ്ങളില് വൈറലായിരുന്നു. ഇതിനു പിന്നാലെയാണ് കേസ്. ഹരിയാന സ്വദേശി 26കാരനായ നവദീപ് സിംഗിനെതിരെയാണ് ഡെല്ഹി പൊലീസ് കേസെടുത്തിരിക്കുന്നത്.
കലാപശ്രമം, കോവിഡ് മാനദണ്ഡങ്ങളുടെ ലംഘനം എന്നീ കുറ്റങ്ങള് ചുമത്തിയാണ് കേസ് രജിസ്റ്റര് ചെയ്തിരിക്കുന്നത്. ഫാര്മേഴ്സ് ബോഡി നേതാവ് ജൈ സിംഗിന്റെ മകനാണ് നവദീപ്. നവദീപും കര്ഷകനാണ്. കര്ഷക മാര്ച്ചിന്റെ മാദ്ധ്യമങ്ങളില് പ്രചരിച്ച ദൃശ്യങ്ങളില് ഏറ്റവും അഭിനന്ദങ്ങള് ഏറ്റുവാങ്ങിയ വീഡിയോ നവദീപിന്റേതായിരുന്നു. സമൂഹ മാദ്ധ്യമങ്ങള് ഒരു താര പരിവേഷമാണ് നവദീപിനു നല്കിയത്.
”ഞാന് നിയമവിരുദ്ധമായ ഒരു കാര്യത്തിലും ഏര്പ്പെട്ടിട്ടില്ല. പ്രതിഷേധിക്കാനുള്ള കര്ഷകരുടെ സമര്പ്പണമാണ് ജലപീരങ്കി വാഹനത്തിനു മുകളില് കയറി ഓഫ് ചെയ്യാന് എന്നെ പ്രേരിപ്പിച്ചത്. സമാധാനപരമായി പ്രതിഷേധിക്കുകയായിരുന്നു ഞങ്ങള്. ഡെല്ഹിയിലേക്ക് കടന്നുപോകാന് ഞങ്ങളെ അനുവദിക്കണമെന്ന് ആവശ്യപ്പെട്ടെങ്കിലും പൊലീസ് ഞങ്ങളുടെ വഴി തടഞ്ഞു.”- നവദീപ് മാദ്ധ്യമങ്ങളോട് പ്രതികരിച്ചു.
Also Read: ‘വോഗ് ഇന്ത്യ ലീഡര് ഓഫ് ദ ഇയര്’ പുരസ്കാരം ആരോഗ്യമന്ത്രി കെകെ ശൈലജക്ക്
