‘കമ്മട്ടിപ്പാട’ത്തിന് ശേഷം രാജീവ് രവി സംവിധാനം ചെയ്ത നിവിന് പോളി ചിത്രം ‘തുറമുഖം’ റോട്ടര്ഡാം രാജ്യാന്തര ചലച്ചിത്ര മേളയിലേക്ക് തിരഞ്ഞെടുക്കപ്പെട്ടു. ചലച്ചിത്രോല്സവത്തിലെ ബിഗ് സ്ക്രീന് മല്സര വിഭാഗത്തിലേക്കാണ് ‘തുറമുഖ’ത്തെ തിരഞ്ഞെടുത്തിരിക്കുന്നത്. അമ്പതാമത് റോട്ടര്ഡാം ഫിലിം ഫെസ്റ്റിവലിലെ മല്സര വിഭാഗത്തില് മാറ്റുരക്കുക വിവിധ രാജ്യങ്ങളില് നിന്നുള്ള 15 സിനിമകളാണ്.
തുറമുഖത്തിന്റെ ആദ്യ പ്രദര്ശനമാണ് 2021 ഫെബ്രുവരി ഒന്നു മുതല് ഏഴ് വരെയും, ജൂണ് രണ്ട് മുതല് ആറ് വരെയും നടക്കുന്ന ചലച്ചിത്രോല്സവത്തില് നടക്കുക.
കൊച്ചി തുറമുഖം പശ്ചാത്തലമാക്കി ഒരുക്കിയ പിരീഡ് ഡ്രാമയായ ‘തുറമുഖം’ 1950കളുടെ കഥയാണ് പറയുന്നതെന്ന് നേരത്തെ റിപ്പോര്ട്ടുകൾ ഉണ്ടായിരുന്നു. നിവിന് പോളിയെ കൂടാതെ നിമിഷ സജയന്, ഇന്ദ്രജിത്ത് സുകുമാരന്, പൂര്ണിമ ഇന്ദ്രജിത്ത്, അര്ജുന് അശോകന്, ജോജു ജോര്ജ്, മണികണ്ഠന് ആചാരി, സുദേവ് നായര് എന്നിവരും ചിത്രത്തില് പ്രധാന കഥാപാത്രങ്ങളായി എത്തുന്നു.
രാജീവ് രവി തന്നെ ഛായാഗ്രഹണവും നിര്മിക്കുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് ഗോപന് ചിദംബരമാണ്. പിതാവ് കെഎന് ചിദംബരം എഴുതിയ നാടകത്തെ ആസ്പദമാക്കിയാണ് ഗോപന് തിരക്കഥ ഒരുക്കിയത്.
ഗീതു മോഹന്ദാസിന്റെ സംവിധാനത്തില് പുറത്തിറങ്ങിയ ‘മൂത്തോന്’ ശേഷം നിവിന്റെ ഏറ്റവും ശക്തവും ശ്രദ്ധേയവുമായ ചിത്രമായിരിക്കും ‘തുറമുഖം’ എന്നാണ് പ്രതീക്ഷിക്കുന്നത്. രാജീവ് രവിയും നിവിനും ആദ്യമായി ഒന്നിക്കുന്ന ചിത്രം കൂടിയായ ‘തുറമുഖ’ത്തിനായുള്ള കാത്തിരിപ്പിലാണ് സിനിമാസ്വാദകര്.
Read Also: 650 കോടിയുടെ ബജാജിന്റെ വമ്പന് നിര്മാണ പ്ളാന്റ് വരുന്നു
