വാഷിംഗ്ടൺ: കോവിഡ് വ്യാപനം കണക്കിലെടുത്ത് ടെന്നസിയിലെ നാഷ്‌വില്ലിൽ നടക്കുന്ന കൺട്രി മ്യൂസിക് ഫെസ്‌റ്റിവൽ (സിഎംഎ ഫെസ്‌റ്റ്) ഒഴിവാക്കി. തുടർച്ചയായി രണ്ടാം വർഷമാണ് ഫെസ്‌റ്റ് റദ്ദാക്കുന്നത്.
കൺട്രി മ്യൂസിക് അസോസിയേഷൻ ചൊവ്വാഴ്‌ച ജൂൺ ഇവന്റ് റദ്ദാക്കാനുള്ള തീരുമാനം പ്രഖ്യാപിച്ചതായി ഫോക്‌സ് ന്യൂസ് റിപ്പോർട് ചെയ്‌തു.
1972ൽ ‘ഫാൻ ഫെയർ’ എന്ന പേരിൽ ആരംഭിച്ച ഈ ഫെസ്‌റ്റ് രാജ്യത്തെ ഏറ്റവും പഴയ സംഗീത മേളകളിലൊന്നാണ്. കഴിഞ്ഞ വർഷവും മേള റദ്ദാക്കിയിരുന്നു.
ഫെസ്‌റ്റിനെത്തുന്ന നിരവധിയായ കലാകാരൻമാരെയും ക്രൂ അംഗങ്ങളെയും ആരാധകരെയും സുരക്ഷിതമായി ഒരുമിച്ച് കൊണ്ടുവരുന്നതിൽ നിരവധി വെല്ലുവിളികൾ ഉണ്ടെന്ന് സിഎംഎ സി‌ഇ‌ഒ സാറാ ട്രാഹെൻ പ്രസ്‌താവനയിലൂടെ അറിയിച്ചു. കൂടാതെ, സംഗീത മേള രാജ്യത്തിന് അകത്തും പുറത്തുമായി നിരവധി സന്ദർശകരെ ആകർഷിക്കുമെന്നും അത് യാത്രാ നിയന്ത്രണങ്ങളെ ബാധിക്കുമെന്നും അധികൃതർ അറിയിച്ചു.
അതേസമയം കഴിഞ്ഞ വർഷം പാസുകൾ വാങ്ങി ഈ വർഷം ഉപയോഗിക്കാൻ തീരുമാനിച്ചിരുന്ന ആളുകൾക്ക് പാസ് 2022 വരെ നിലനിർത്താൻ അവസരമുണ്ടെന്നും അല്ലാത്തവർക്ക് CMAFest.com ലൂടെ റീ ഫണ്ട് ലഭിക്കുമെന്നും അധികൃതർ വ്യക്‌തമാക്കി.
Read Also: ഒരു ലക്ഷത്തിന് മുകളിലെ പണമിടപാടുകൾ അറിയിക്കണം; ബാങ്കുകൾക്ക് തിരഞ്ഞെടുപ്പ് കമ്മീഷന്റെ നിർദേശം
