ന്യൂഡെൽഹി:കഴിഞ്ഞ 24 മണിക്കൂറിനിടെ രാജ്യത്ത് 29,164 കോവിഡ് കേസുകൾ കൂടി പുതുതായി സ്‌ഥിരീകരിച്ചു. നാലുമാസത്തിനിടെ ഇന്ത്യയിൽ റിപ്പോർട്ട് ചെയ്‌ത ഏറ്റവും കുറഞ്ഞ കോവിഡ് നിരക്കാണിത്. ഇതോടെ രാജ്യത്ത് ആകെ കോവിഡ് സ്‌ഥിരീകരിച്ചവരുടെ എണ്ണം 88,74,291 ആയതായി ആരോഗ്യമന്ത്രാലയം അറിയിച്ചു.
24 മണിക്കൂറിനിടെ 449 പേരാണ് കോവിഡ് ബാധിച്ച് മരണമടഞ്ഞത്. ഇതോടെ രാജ്യത്ത് ആകെ രോഗം ബാധിച്ച് മരിച്ചവരുടെ എണ്ണം 1,30,519 ആയി. 4.53 ലക്ഷം പേർ നിലവിൽ കോവിഡ് ചികിൽസയിൽ കഴിയുകയാണ്. 40,791 പേർ രോഗമുക്‌തി നേടി. 82,90,371 പേർ ഇതുവരെ രോഗ മുക്‌തരായിട്ടുണ്ട്. ഇതോടെ രാജ്യത്തെ കോവിഡ് രോഗമുക്‌തി നിരക്ക് 83 ശതമാനമായി.
അതേസമയം കോവിഡ് വാക്‌സിൻ സംബന്ധിച്ച് പുറത്തുവരുന്ന വാർത്തകൾ ലോകത്തിന് പ്രതീക്ഷ നൽകുന്നുണ്ട്. അമേരിക്കൻ കമ്പനിയായ ഫൈസറിന്റെ കോവിഡ് വാക്‌സിനും റഷ്യയുടെ സ്പുട്നിക് വാക്‌സിനും പരീക്ഷണം വിജയകരമാണെന്ന് അടുത്തിടെ പ്രഖ്യാപിച്ചിരുന്നു. അതിനു പിന്നാലെ അമേരിക്കൻ കമ്പനിയായ മോഡേണയും വാക്‌സിൻ പരീക്ഷണം വിജയകരമാണെന്ന് അറിയിച്ചിട്ടുണ്ട്. തങ്ങളുടെ കോവിഡ് വാക്‌സിൻ 94.5 ശതമാനം ഫലപ്രദമാണെന്നാണ് മോഡേണയുടെ വാദം.
Read also: പ്രതിദിന കോവിഡ് കണക്കുകൾ റെക്കോർഡിൽ എത്തിയെന്ന് ലോകാരോഗ്യ സംഘടന
