വയനാട് : ജില്ലയിൽ ബത്തേരി ടൗണിലെ വ്യാപാരിയുടെ പേരിൽ വ്യാജ ഫേസ്ബുക്ക് അക്കൗണ്ട് ഉണ്ടാക്കി സുഹൃത്തുക്കളിൽ നിന്നും പണം കവരാൻ ശ്രമം. ബത്തേരി ഒഎം സ്റ്റോർ ഉടമ ഓലപ്പുരക്കൽ അവറാച്ചന്റെ പേരിലാണ് തട്ടിപ്പു സംഘം വ്യാജ അക്കൗണ്ട് നിർമിച്ചത്. ഇയാളുടെ ഒറിജിനൽ അക്കൗണ്ടിൽ നിന്നുള്ള ഫോട്ടോയും വിവരങ്ങളും ഉപയോഗിച്ചാണ് വ്യാജ അക്കൗണ്ട് നിർമിച്ചത്. തുടർന്ന് ഇദ്ദേഹത്തിന്റെ സുഹൃത്തുക്കളോട് പണം ആവശ്യപ്പെട്ട് കൊണ്ട് മെസേജുകൾ അയക്കുകയായിരുന്നു.
3,000 രൂപ മുതൽ 30,000 രൂപ വരെയാണ് ഇത്തരത്തിൽ തട്ടിപ്പ് നടത്തിയ ആൾ ആവശ്യപ്പെട്ടത്. ഇത് അയക്കുന്നതിനായി ഗൂഗിൾ പേ നമ്പറും അയച്ചു നൽകിയിരുന്നു. അതേസമയം തന്നെ പണം ആവശ്യപ്പെട്ടുകൊണ്ടുള്ള സന്ദേശം ലഭിച്ചവരിൽ ചിലർ അവറാച്ചനോട് ഫോൺ വിളിച്ച് കാര്യങ്ങൾ തിരക്കിയതോടെയാണ് സംഭവം പുറത്തറിയുന്നത്. ബുധനാഴ്ച രാത്രി 12 മണി മുതൽ ഇന്നലെ രാവിലെ 10 മണി വരെയാണ് അക്കൗണ്ട് പ്രവർത്തിച്ചിരുന്നത്. ഈ സമയത്ത് 300ഓളം ആളുകളോട് പണം ചോദിച്ചതായാണ് ലഭിക്കുന്ന വിവരം.
സംഭവത്തെ തുടർന്ന് നടത്തിയ അന്വേഷണത്തിൽ ഒരാൾ 10,000 രൂപ അക്കൗണ്ടിലേക്ക് നിക്ഷേപിച്ചതായി കണ്ടെത്തിയിട്ടുണ്ട്. മറ്റാരെങ്കിലും പണം നൽകിയിട്ടുണ്ടോ എന്ന കാര്യത്തിൽ അന്വേഷണം നടക്കുകയാണ്. പണം ഗൂഗിൾ പേ ചെയ്യാൻ തന്ന നമ്പറിൽ വിളിച്ചിട്ട് പ്രതികരണം ഉണ്ടായിട്ടില്ലെന്നും, സന്ദേശത്തിനോട് മലയാളത്തിൽ പ്രതികരിച്ചാൽ മറുപടി നൽകിയിരുന്നില്ലെന്നും ചിലർ പോലീസിൽ വ്യക്തമാക്കി.
Read also : ജഡ്ജിക്ക് കോവിഡ്; ഐഎൻഎക്സ് മീഡിയ കേസ് പരിഗണിക്കുന്നത് മാറ്റിവച്ചു