പാലക്കാട്: കഴിഞ്ഞ ദിവസങ്ങളായി തുടരുന്ന കനത്ത മഴയിൽ ജില്ലയിൽ വ്യാപക കൃഷിനാശം. 3 പഞ്ചായത്തുകളിലായി 600 ഏക്കറിലധികം കൃഷിനാശമാണ് ഉണ്ടായിട്ടുള്ളത്. പുതുശ്ശേരി, മരുതറോഡ്, എലപ്പുള്ളി എന്നീ 3 പഞ്ചായത്തുകളിലാണ് കൊയ്‌ത്തിന് പാകമായ നെൽകൃഷി കഴിഞ്ഞ ഒരാഴ്‌ചക്കിടെ നശിച്ചത്.
ഈ പഞ്ചായത്തുകളിലെ മരുതറോഡ്, കൊട്ടേക്കാട്, വേനോലി, ചുള്ളിമട, കഞ്ചിക്കോട്, കല്ലേപ്പുള്ളി, തേനാരി, പള്ളത്തേരി, വേങ്ങോടി, രാമശ്ശേരി, നോമ്പിക്കോട്, വടകോട് തുടങ്ങിയ പ്രദേശങ്ങളിലാണ് ഏറ്റവും കൂടുതൽ കൃഷിനാശം ഉണ്ടായിട്ടുള്ളത്. ഇവിടങ്ങളിൽ അടുത്ത ആഴ്‌ചയോടെ മിക്ക കർഷകരും കൊയ്‌ത്ത് നടത്താനിരിക്കുകയായിരുന്നു. ഈ സാഹചര്യത്തിലാണ് കഴിഞ്ഞ ഒരാഴ്‌ചക്കിടെ ഉണ്ടായ ശക്‌തമായ മഴയിൽ കൃഷിനാശം സംഭവിച്ചത്.
കോവിഡിനെയും, പ്രതികൂല കാലാവസ്‌ഥയെയും അതിജീവിച്ചാണ് മിക്കവരും കൃഷിയിറക്കിയത്. നിലവിൽ ഇവർക്ക് വലിയ നാശനഷ്‌ടമാണ് ഉണ്ടായത്. പലയിടത്തും കതിർ ചീഞ്ഞു തുടങ്ങിയതിനാൽ മഴ മാറി വെയിൽ ഉറച്ചാലും കൊയ്‌ത്ത് സാധ്യമല്ലെന്നും കർഷകർ പറയുന്നു.
Read also: ഗർഭിണിയെയും മകനെയും കൊലപ്പെടുത്തിയ കേസ്; പ്രതിയുടെ ശിക്ഷ ഇന്ന്
