മഞ്‌ജു വാര്യർ, സണ്ണി വെയിൻ എന്നിവർ പ്രധാന കഥാപാത്രങ്ങളായി എത്തുന്ന ‘ചതുർമുഖം‘ എന്ന ചിത്രത്തിന്റെ ട്രെയ്‌ലർ പുറത്തുവിട്ടു. ഡാർക്ക് ഷേഡിൽ അവതരിപ്പിച്ച ചിത്രം കഥയിലും അവതരണ മികവിലും വളരെ സങ്കീർണമായ ആശയം കൈകാര്യം ചെയ്യുന്ന മലയാള സിനിമയിലെ ആദ്യത്തെ ‘ടെക്നോ ഹൊറർ‘ സിനിമയാണ്. ജിസ് ടോംസ് മൂവീസിന്റെയും മഞ്‌ജു വാര്യർ പ്രൊഡക്ഷന്റെയും ബാനറിൽ പുറത്തിറക്കുന്ന ചിത്രം സംവിധാനം ചെയ്‌തിരിക്കുന്നത് രഞ്‌ജിത്ത് കമല ശങ്കറും, സലിൽ വി യും ചേർന്നാണ്.
ഹൊറര്‍ ചിത്രങ്ങള്‍ മലയാളികള്‍ക്ക് പരിചിതമാണെങ്കിലും ടെക്നോ ഹൊറര്‍ ചിത്രം എന്നത് മലയാള ചലച്ചിത്ര ആസ്വാദകരെ സംബന്ധിച്ച് അല്‍പം പുതുമ നിറഞ്ഞതാണ്. ഹൊറര്‍ ഫിക്ഷന്‍ ചിത്രങ്ങളുടെ ഒരു ഉപവിഭാഗമാണ് ടെക്നോ ഹൊറര്‍ ചിത്രങ്ങൾ. ശാസ്‌ത്രത്തേയും സാങ്കേതിക വിദ്യയേയും ഉപയോഗപ്പെടുത്തി കാഴ്‌ചക്കാരിൽ ഭീതി ജനിപ്പിക്കാൻ ടെക്നോ ഹൊറർ ചിത്രങ്ങൾക്ക് കഴിയുന്നു. സയന്‍സ് ഫിക്ഷനും, ഫാന്റസിയുമൊക്കെ ഇത്തരം ചിത്രങ്ങളുടെ ഭാഗമാകുന്നുണ്ട്.
അലൻസിയർ, നിരഞ്‌ജന അനൂപ്, ശ്യാമപ്രസാദ്, കലാഭവൻ പ്രജോദ് എന്നിവരും മറ്റു കഥാപാത്രങ്ങളായി എത്തുന്നു. അഭയ കുമാർ കെ, അനിൽ കുര്യൻ എന്നിവരാണ് നിഗൂഢത ഒളിപ്പിക്കുന്ന സിനിമയുടെ കഥ തിരക്കഥ, സംഭാഷണം എന്നിവ രചിച്ചിരിക്കുന്നത്. അഭിനന്ദൻ രാമാനുജമാണ്‌ ഛായാഗ്രഹണം. സെഞ്ച്വറി ഫിലിംസാണ് ചിത്രത്തിന്റെ വിതരണം നിർവഹിക്കുന്നത്. ചതുർമുഖം മികച്ച തിയേറ്റർ അനുഭവം പ്രേക്ഷകർക്ക് സമ്മാനിക്കുമെന്നാണ് അണിയറ പ്രവർത്തകരുടെ പ്രതീക്ഷ. ഏപ്രിൽ 8നാണ് റിലീസ്.
Read Also: ‘മോഹന്‍കുമാര്‍ ഫാന്‍സ്’ സിനിമയെ സംബന്ധിച്ചുള്ള ‘ഏപ്രിൽഫൂൽ’ തമാശ; വിശദീകരണവുമായി രാഹുൽ ഈശ്വർ
