തിരുവനന്തപുരം: സംസ്ഥാന സ്പോർട്സ് കൗൺസിൽ മുഖേന നൽകുന്ന അവശ കായികതാരങ്ങളുടെ പെന്ഷന് തുക സർക്കാർ വർധിപ്പിച്ചു. 1300 രൂപയായാണ് ഉയർത്തിയിരിക്കുന്നത്. പെന്ഷന് അര്ഹതക്കുള്ള കുടുംബ വാര്ഷിക വരുമാന പരിധി ഒരു ലക്ഷം രൂപയായും ഉയർത്തി. നിലവില് ഇരുപതിനായിരം രൂപയായിരുന്നു വരുമാന പരിധി. വരുമാനപരിധി ഉയര്ത്തുന്നതോടെ കൂടുതല് കായികതാരങ്ങള് പെന്ഷന് അര്ഹത നേടും.
70 വയസിന് മേല് 1,100 രൂപ, 60 മുതല് 70 വരെ 850 രൂപ, 55 മുതല് 60 വരെ 600 രൂപ എന്ന ക്രമത്തിലാണ് നിലവില് പെൻഷൻ നല്കിയിരുന്നത്. 55നും 60നും ഇടയില് പ്രായമുള്ളവര്ക്ക് നിലവിലെ നിരക്ക് തുടരും. പുതിയ പെൻഷനുള്ള അർഹതാ മാനദണ്ഡത്തിൽ അപേക്ഷകന്റെ പ്രായം 60 വയസിൽ കുറയരുതെന്ന് നിശ്ചയിക്കാനും തീരുമാനിച്ചിട്ടുണ്ട്.
അവശ കായിക പെൻഷൻ വാങ്ങുന്നവർ മറ്റു സാമൂഹ്യ പെൻഷനുകൾ കൈപ്പറ്റുന്നില്ലെന്ന് ഉറപ്പാക്കാൻ ഡിബിടി (ഡയറക്ട് ബെനിഫിറ്റ് ട്രാൻസ്ഫർ) വഴി ആധാർബന്ധിതമായി വിതരണം നടത്താനും നിശ്ചയിച്ചു. സ്പോർട്സ് കൗൺസിൽ തുടർനടപടികൾ സ്വീകരിക്കും.
പെന്ഷന് പുതിയ അപേക്ഷകൾ ക്ഷണിക്കാനും കൂടുതല്പേര്ക്ക് പെന്ഷന് നല്കാനും നടപടി സ്വീകരിക്കുമെന്ന് കായിക മന്ത്രി വി അബ്ദു റഹിമാൻ അറിയിച്ചു. ഇതിനായി,പെന്ഷന് കമ്മിറ്റി ഉടന് വിളിച്ചുചേര്ക്കുമെന്നും മന്ത്രി പറഞ്ഞു.
Also Read: സിക; രോഗവ്യാപനം തടയാൻ കർശന നടപടി, ഗർഭിണികളിൽ പരിശോധന നടത്തും