തിരുവനന്തപുരം : സംസ്‌ഥാനത്തിന്റെ വിവിധ ഭാഗങ്ങളിൽ ശക്‌തമായ തുടരുന്നു. ഇതേ തുടർന്ന് 4 ജില്ലകളിൽ ഇന്ന് ഓറഞ്ച് അലർട് പ്രഖ്യാപിച്ചു. ഇടുക്കി, മലപ്പുറം, കോഴിക്കോട്, വയനാട് എന്നീ ജില്ലകളിലാണ് ഇന്ന് ഓറഞ്ച് അലർട്. കൂടാതെ മറ്റ് ജില്ലകളിൽ യെല്ലോ അലർടും പ്രഖ്യാപിച്ചിട്ടുണ്ട്. സംസ്‌ഥാനത്ത് നാളെയും ശക്‌തമായ മഴ തുടരാൻ സാധ്യത ഉണ്ടെന്നാണ് അധികൃതർ വ്യക്‌തമാക്കുന്നത്‌. അതിനാൽ എല്ലാ ജില്ലകളിലും നാളെ യെല്ലോ അലർട് പ്രഖ്യാപിച്ചിട്ടുണ്ട്.
അടുത്ത ചൊവ്വാഴ്‌ച വരെ ഇത്തരത്തിൽ ശക്‌തമായ മഴ കേരളത്തിൽ തുടരുമെന്നാണ് കാലാവസ്‌ഥാ നിരീക്ഷണ കേന്ദ്രം വ്യക്‌തമാക്കുന്നത്‌. കനത്ത മഴയെ തുടർന്ന് മലപ്പുറം, ഇടുക്കി, പാലക്കാട് എന്നീ ജില്ലകളില്‍ പലയിടങ്ങളിലും മണ്ണിടിച്ചിലും കൃഷി നാശവുമുണ്ടായിട്ടുണ്ട്. മലയോര മേഖലയിൽ മഴ ശക്‌തമാകാൻ സാധ്യതയുള്ളതിനാൽ ആളുകൾ കൂടുതൽ ജാഗ്രത പാലിക്കണമെന്ന് അധികൃതർ വ്യക്‌തമാക്കി.
മഴക്കൊപ്പം തന്നെ കടൽക്ഷോഭം രൂക്ഷമാകാൻ സാധ്യത ഉള്ളതിനാൽ മൽസ്യ ബന്ധനത്തിനായി കടലിൽ പോകുന്നതിന് വിലക്ക് ഏർപ്പെടുത്തിയിട്ടുണ്ട്. മറ്റന്നാൾ വരെ കടലിൽ പോകുന്നതിന് വിലക്ക് തുടരുമെന്നാണ് അധികൃതർ വ്യക്‌തമാക്കിയത്‌.
Read also : കോവിഡ് മാനദണ്ഡം ലംഘിച്ച് വിവാഹം നടത്തി; വീട്ടുടമക്കെതിരെ കേസ്
