റീലുകള്ക്ക് വേണ്ടി പ്രത്യേകം ടാബ് അവതരിപ്പിച്ച് ഇന്സ്റ്റഗ്രാം. 15 സെക്കന്റ് ദൈര്ഘ്യമുള്ള ചെറിയ വീഡിയോകളാണ് റീലുകളില് ഉള്പെടുത്താന് സാധിക്കുക. ഉപയോക്താവിന്റെ താല്പര്യത്തിനനുസരിച്ച്, ശബ്ദങ്ങളും വീഡിയോ ഇഫക്റ്റുകളും നല്കി മനോഹരമാക്കുവാനും സാധിക്കുന്ന വിധമാണ് റീലുകള് തയാറാക്കിയിരിക്കുന്നത്.
കഴിഞ്ഞ ജൂലൈയിലാണ് ഫേസ്ബുക്ക് ഉടമസ്ഥതയിലുള്ള ഇന്സ്റ്റഗ്രാമില് ഇത്തരമൊരു സംവിധാനം അവതരിപ്പിക്കുന്നത്. ടിക് ടോക്കിന്റെ നിരോധനത്തിനുശേഷം, ഉപയോക്താക്കള് ഇന്സ്റ്റഗ്രാമിന്റെ പുതിയ ഫീച്ചര് ഏറ്റെടുക്കുകയായിരുന്നു. ലോകത്ത് ആദ്യമായി ഇന്ത്യയിലാണ് ഈ ഫീച്ചര് അവതരിപ്പിക്കുന്നത്. ഉപയോക്താവിന്റെ പ്രൊഫൈലില് ആയിരുന്നു നേരത്തെ ഇന്സ്റ്റഗ്രാം റീലുകള് ലഭ്യമായിരുന്നത്. എന്നാല് ഇപ്പോള് റീലുകള്ക്ക് മാത്രമായി പ്രത്യേകം ടാബ് അവതരിപ്പിച്ചിരിക്കുകയാണ് ഇന്സ്റ്റഗ്രാം.
നാവിഗേഷന് ബാറില് എക്സ്പ്ലോര് ടാബിന് പകരമായാണ് റീലുകള് ലഭ്യമാകുന്നത്. ഇന്സ്റ്റഗ്രാം റീലുകള് മാത്രമേ ഇവിടെ കാണുകയുള്ളു. ഓട്ടോ-പ്ലേ രീതിയിലാവും വീഡിയോകള് കാണുക. നേരത്തെ നേവിഗേഷന് ബാറിലുണ്ടായിരുന്ന എക്സ്പ്ലോര് ടാബ് ഇനി മുതല് ഇന്സ്റ്റഗ്രാം ഫീഡിന്റെ ഏറ്റവും മുകളില് വലത് വശത്തായാണ് ലഭ്യമാവുക.