ടൊവിനോ തോമസ് നായകനായ റോഡ് മൂവി ‘കിലോമീറ്റേഴ്സ് ആൻഡ് കിലോമീറ്റേഴ്സ് ‘ നാളെ ഏഷ്യാനെറ്റിലൂടെ ലോകവ്യാപകമായി റിലീസ് ചെയ്യും. ഏറെക്കാലത്തിന് ശേഷമാണ് മലയാളത്തിൽ നേരിട്ട് ടെലിവിഷനിലൂടെ സിനിമ റിലീസ് ചെയ്യുന്നത്. ചിത്രത്തിന്റെ ഭൂരിഭാഗവും വ്യാജ പ്രിന്റ് ചോർന്നുവെന്ന് കാണിച്ച് നിർമ്മാതാവ് ആന്റോ ജോസഫ് ഫിലിം എക്സിബിറ്റേഴ്സ് യൂണിയന് കത്തയച്ചിരുന്നു. തുടർന്ന് ചിത്രത്തിന് ഓൺലൈൻ പ്ലാറ്റ്ഫോമിലൂടെയുള്ള റിലീസിന് അനുമതി നൽകി.
കോവിഡ് പ്രതിസന്ധി കാരണം നിർത്തിവെച്ച തിയേറ്റർ റിലീസുകൾ സമീപകാലത്തൊന്നും പുനരാരംഭിക്കാൻ സാധ്യതയില്ല. ഇതുകൂടി പരിഗണിച്ചാണ് ടെലിവിഷനിലൂടെയുള്ള റിലീസ്. ടൊവിനോ തോമസിന് പുറമേ ജോജു ജോർജ്, ഇൻഡിയ ജാർവിസ്, സിദ്ധാർഥ് ശിവ, ബേസിൽ ജോസഫ്, വിനയ് ഫോർട്ട്, രമേശ് പിഷാരടി എന്നിവരാണ് മറ്റ് അഭിനേതാക്കൾ.
ജിയോ ബേബി സംവിധാനം ചെയ്ത ചിത്രത്തിന്റെ തിരക്കഥ ജിയോ ബേബിക്കൊപ്പം ദീപു പ്രദീപും കൂടി ചേർന്നാണ് ഒരുക്കിയത്. സൂരജ് എസ് കുറുപ്പാണ് ചിത്രത്തിലെ ഗാനങ്ങൾ ചിട്ടപ്പെടുത്തിയത്, പശ്ചാത്തല സംഗീതം സുഷിൻ ശ്യാമാണ് നിർവഹിച്ചത്.
ഈ വർഷം മാർച്ച് 12 നായിരുന്നു ചിത്രത്തിന്റെ റിലീസ് തീരുമാനിച്ചിരുന്നത്. അടച്ചിടൽ പ്രഖ്യാപിച്ചതിന് ശേഷം ചിത്രത്തിന്റെ വ്യാജ പതിപ്പുകൾ ഓൺലൈനിലൂടെ പ്രചരിച്ചിരുന്നു.