ചെന്നൈ: തമിഴ്നാട്ടിൽ മെയ് ഒന്നിനും വോട്ടെണ്ണൽ ദിനമായ മെയ് രണ്ടിനും മുഴുവൻ സമയ ലോക്ക്ഡൗൺ നടപ്പാക്കുന്നത് സംബന്ധിച്ച് തീരുമാനമെടുക്കാൻ മുഖ്യമന്ത്രി വിളിച്ച ഉന്നതതല യോഗം ഇന്ന് ചെന്നൈയിൽ നടക്കും. കോവിഡ് വ്യാപനത്തിന്റെ പശ്ചാത്തലത്തിൽ ഈ രണ്ട് ദിവസവും ലോക്ക്ഡൗൺ നടപ്പാക്കണമെന്ന് തമിഴ്നാട് ഹൈക്കോടതി നിർദേശിച്ചിരുന്നു.
കോവിഡ് കേസുകൾക്കൊപ്പം മരണനിരക്കും ഉയരുന്ന സാഹചര്യത്തിലാണ് നിയന്ത്രണം ശക്തമാക്കുന്നത്. വോട്ടെണ്ണൽ ദിനം ലോക്ക്ഡൗൺ നടപ്പാക്കുന്ന കാര്യത്തിൽ പ്രതിപക്ഷ പാർട്ടികളുടെ അഭിപ്രായവും സർക്കാർ തേടിയിട്ടുണ്ട്. കൃത്യമായ സുരക്ഷാ മുൻകരുതൽ സ്വീകരിച്ചില്ലെങ്കിൽ വോട്ടെണ്ണൽ നിർത്തിവെപ്പിക്കുമെന്ന് തമിഴ്നാട് ഹൈക്കോടതി തിരഞ്ഞെടുപ്പ് കമ്മീഷന് മുന്നറിയിപ്പ് നൽകിയിരുന്നു.
അതേസമയം, കർണാടകയിൽ ഇന്ന് രാത്രി 9 മുതൽ കോവിഡ് കർഫ്യു പ്രാബല്യത്തിൽ വരും. മെയ് 10 വരെ 14 ദിവസത്തേക്കാണ് നിയന്ത്രണങ്ങൾ. പൊതുഗതാഗത സംവിധാനം ഉൾപ്പടെ ഇന്ന് രാത്രി 9 മണി മുതൽ പ്രവർത്തിക്കില്ല. സംസ്ഥാനത്ത് കോവിഡ് പ്രതിദിന വ്യാപനം ഇന്നലെയും കാൽ ലക്ഷം കടന്നു, പ്രതിദിന മരണം ദിവസങ്ങളായി 200ന് മുകളിലാണ്.
Also Read: കോവിഡ് പ്രതിസന്ധി; ഇന്ത്യക്ക് പിന്തുണയുമായി പാക് ക്രിക്കറ്റ് താരം ബാബർ അസം