ന്യൂഡൽഹി: പാർലമെന്റ് വർഷകാല സമ്മേളനം ഈ മാസം 14ന് ആരംഭിക്കും. ലോക് സഭ സെക്രട്ടറിയേറ്റ് പുറത്തുവിട്ട അറിയിപ്പിലാണ് ഇക്കാര്യം വ്യക്തമാക്കിയത്. 14ന് രാവിലെ 9 മണിക്ക് ലോക് സഭ ചേരും. അന്നു തന്നെ മറ്റൊരു സമയത്ത് രാജ്യസഭയും ചേർന്നേക്കും. കോവിഡ് 19 നിയന്ത്രണങ്ങൾ പാലിച്ചായിരിക്കും ഇരു സഭകളും ചേരുക.
പാർലമെന്റ് കാര്യ മന്ത്രാലയത്തിലെ ക്യാബിനറ്റ് കമ്മിറ്റി മുൻപ് ശുപാർശ ചെയ്തത് പ്രകാരമാണ് നടപടി. ആകെ 18 സെഷനുകളാണ് സമ്മേളനത്തിൽ ഉണ്ടാവുകയെന്നും അവധികൾ ഉണ്ടാവില്ലെന്നും ഔദ്യോഗിക വൃത്തങ്ങൾ അറിയിച്ചു.
സഭകൾ ചേരുന്നതിനു മുന്നോടിയായി പാർലമെന്റ് മന്ദിരത്തിൽ കോവിഡ് നിയന്ത്രണങ്ങൾ ഏർപ്പെടുത്താനുള്ള നടപടികൾ അതിവേഗം പുരോഗമിക്കുകയാണ്. സമ്മേളനത്തിൽ പങ്കെടുക്കുന്ന മുഴുവൻ അംഗങ്ങളെയും കോവിഡ് പരിശോധനക്ക് വിധേയമാക്കിയേക്കും. സംയുക്ത സമ്മേളനങ്ങൾ ഉണ്ടാവില്ല. സാമൂഹ്യ അകലം പാലിച്ചായിരിക്കും ഇരിപ്പിടങ്ങൾ ഒരുക്കുക. കൂടുതൽ ആളുകളെ ഗാലറിയിൽ പ്രവേശിക്കാൻ അനുവദിക്കില്ല.