മലപ്പുറം : കോവിഡ് വ്യാപനം രൂക്ഷമായതിനെ തുടർന്ന് സംസ്ഥാനത്ത് ഏർപ്പെടുത്തിയ രാത്രി കർഫ്യൂ ലംഘിച്ചതിന് ജില്ലയിൽ 200ഓളം പേർക്കെതിരെ കേസ്. പെരുമ്പടപ്പ് പോലീസാണ് കേസ് എടുത്തിരിക്കുന്നത്. കഴിഞ്ഞ ദിവസം രാത്രിയിൽ ഉണ്ടായിരുന്ന കർഫ്യൂ ലംഘിച്ച് രാത്രി പുറത്തിറങ്ങിയ ആളുകൾക്ക് എതിരെയാണ് കേസ് എടുത്തത്. കൂടാതെ 150ഓളം ബൈക്കുകളും പോലീസ് കസ്റ്റഡിയിൽ എടുത്തിരുന്നു.
രാത്രി 9 മണി മുതൽ ഏർപ്പെടുത്തിയിരുന്ന കർഫ്യൂ ലംഘിച്ച് ടർഫിൽ കളിക്കാൻ ഒത്തുകൂടുകയും, ആവശ്യമില്ലാതെ റോഡിൽ കറങ്ങി നടക്കുകയും ചെയ്തവരെ പിടികൂടി പെരുമ്പടപ്പ് പോലീസ് പിഴ ചുമത്തിയിട്ടുണ്ട്. പെരുമ്പടപ്പ് സിഐ വിഎം കേഴ്സൺ മാർക്കോസിന്റെ നേതൃത്വത്തിലാണ് കർഫ്യൂ ലംഘിച്ചവരെ പിടികൂടി പിഴ ചുമത്തിയത്.
ടർഫിൽ കളിക്കാനും കളി കാണാനുമായി നിരവധി പേരാണ് കർഫ്യൂ സമയത്ത് ഒത്തുകൂടിയത്. പിടികൂടിയ ബൈക്കുകളിൽ ഏറെയും ഇവിടെ എത്തിയവരുടെ ആയിരുന്നു. നിലവിൽ പിഴ ചുമത്തിയ ശേഷം ബൈക്കുകൾ ഉടമസ്ഥർക്ക് വിട്ടുനൽകിയിട്ടുണ്ട്.
Read also : ഇന്ന് കൂടുതൽ കേന്ദ്രങ്ങളിൽ വാക്സിനേഷൻ; ഓൺലൈൻ രജിസ്ട്രേഷൻ നിർബന്ധം