തിരുവനന്തപുരം: കോൺഗ്രസിൽ തർക്കങ്ങളില്ലെന്ന് പ്രതിപക്ഷ നേതാവ് വിഡി സതീശൻ. ഘടക കക്ഷികളുമായുള്ള ചർച്ച ഉടൻ നടക്കും. നിലവിൽ നടക്കുന്ന തർക്കങ്ങളൊന്നും കോൺഗ്രസിലെ പ്രശ്നങ്ങളുമായി കൂട്ടിക്കെട്ടേണ്ടെന്നും പ്രശ്നപരിഹാരത്തിന് എകെജി സെന്ററിന്റെ ഉപദേശം വേണ്ടെന്നും സതീശൻ തുറന്നടിച്ചു.
കോൺഗ്രസ് പുനഃസംഘടനയുമായി ബന്ധപ്പെട്ട തർക്കങ്ങൾ അടഞ്ഞ അധ്യായമാണെന്നും പ്രതിപക്ഷ നേതാവ് പ്രതികരിച്ചു. പുനഃസംഘടനയുമായി ബന്ധപ്പെട്ട കെപിസിസി അധ്യക്ഷൻ കെ സുധാകരന്റെ നിലപാടുകൾ ശരിവെക്കുന്നതായിരുന്നു വിഡി സതീശന്റെ പ്രതികരണം. പരസ്യപ്രസ്താവനകളിലൂടെ വിഷയം നീട്ടിക്കൊണ്ടുപോകാൻ ആഗ്രഹിക്കുന്നില്ലെന്ന വ്യക്തമായ സന്ദേശമാണ് ഇരുവരും നൽകിയത്.
പരസ്യപ്രസ്താവനകൾ മതിയാക്കാമെന്ന നിലപാടാണ് ഗ്രൂപ്പുകളും സ്വീകരിച്ചിരിക്കുന്നത്. പക്ഷേ, പ്രതികരണങ്ങൾ ഉണ്ടായാൽ മറുപടി നൽകുമെന്നും നേതാക്കൾ പറഞ്ഞു.
Also Read: അര്ജുന് ആയങ്കിക്ക് കർശന ഉപാധികളോടെ ജാമ്യം